რუსეთის საგარეო საქმეთა სამინისტრის წარმომადგენლის, მარია ზახაროვას განცხადებით, მინისტრის ყოფილი მოადგილე, გრიგორი კარასინი ზურაბ აბაშიძესთან მოლაპარაკებებში მონაწილეობას კვლავ მიიღებს. ამჟამად კარასინი რუსეთის ფედერაციის საბჭოს სენატორია.

"რუსეთის ხელისუფლების განკარგულებით, ბატონი კარასინი ამ ფორმატში მონაწილეობას გააგრძელებს. პრაღაში მორიგი შეხვედრა ნოემბრის დასაწყისში იგეგმება", — განაცხადა ზახაროვამ.

საქართველოს პრემიერ-მინისტრის სპეციალური წარმომადგენელი რუსეთის საკითხებში, ზურაბ აბაშიძე და რუსეთის საგარეო საქმეთა მინისტრის უკვე ყოფილი მოადგილე, გრიგორი კარასინი პრაღაში ერთმანეთს ბოლოს 13 ივნისს შეხვდნენ. აბაშიძე-კარასინის ფორმატი 2008 წლის აგვისტოს ომის შემდეგ, 2012 წელს შეიქმნა.

სექტემბრის დასაწყისში კარასინმა მინისტრის მოადგილის თანამდებობა დატოვა. 23 აგვისტოს გრიგორი კარასინი 70 წლის გახდა. კანონის მიხედვით, თანამდებობაზე ყოფნა მას სწორედ ამ ასაკამდე შეეძლო. მინისტრის, სერგეი ლავროვის მოადგილედ ის 2005 წელს დაინიშნა.

2008 წლის აგვისტოს ომისა და ოკუპაციის შემდეგ ჟენევის დისკუსიებში გრიგორი კარასინი რუსეთის მხარეს წარმოადგენს.