საკონსტიტუციო სასამართლოში თავჯდომარეობის კანდიდატებთან დაკავშირებით პლენუმის სხდომა მიმდინარეობს. როგორც მოსამართლე მაია კოპალეიშვილმა მოამბესთან საუბარში განაცხადა, კანდიდატების დასახელებისთვის კანონით გათვალისწინებული ვადა ხვალ იწურება, თუმცა, ვინაიდან ხვალ უქმე დღეა, შესაძლოა კანდიდატთა ვინაობა დღეს გახდეს ცნობილი:

"მე, როგორც იურისტი თუ ვიტყვი, ჩემი პოზიცია კოლეგებმაც იცოდნენ. როდესაც კანდიდატები დასახელდება, ეს ოფიციალურად უნდა დარეგისტრირდეს, შესაბამისი პროცედურა უნდა გაიაროს და საზოგადოებამ უნდა იცოდეს, რომელი კანდიდატები იყრიან კენჭს თავჯდომარეობაზე. ნორმაზე ამასთან დაკავშირებით, არ არის კონკრეტული მოწესრიგება ჩაწერილი, დახურული უნდა იყოს ეს ინფორმაცია თუ ღია, მაგრამ რადგანაც პროცესი საჯაროა, ეს ჩემი მოსაზრებაა, რომ აქ დასამალი არაფერია".

საკონსტიტუციო სასამართლოს თავჯდომარის მოვალეობის შემსრულებელი, ზაზა თავაძე ამბობს, რომ თავჯდომარის კანდიდატთა არჩევის პროცესი მაქსიმალურად გამჭვირვალედ უნდა ჩატარდეს, რადგან საქმე ეხება იმ ადამიანის არჩევას, რომელიც ქვეყანაში უნდა იყოს ადამიანის ძირითადი უფლებებისა და თავისუფლებების დაცვის გარანტი.

საკონსტიტუციო სასამართლოს ახალი თავჯდომარის არჩევა საჭირო მას შემდეგ გახდა, რაც 30 სექტემბერს გიორგი პაპუაშვილს უფლება-მოსილების ვადა ამოეწურა.