რეგიონული განვითარებისა და ინფრასტრუქტურის სამინისტროს ცნობით, ყაზახურ-ჰონკონგური კომპანია Meridian Capital NL B.V.-მა ანაკლიის პროექტში მონაწილეობაზე უარი თქვა. სამინისტროს განცხადებით, 28 ოქტომბერს შესაბამისი თხოვნით კომპანიამ მათ წერილობით მიმართა.

კომპანია Meridian Capital-ის უარი On.ge-ს ანაკლიის განვითარების კონსორციუმშიც დაუდასტურეს. მათივე თქმით, ამ საკითხზე მეტი კომენტარის გავრცელებას ჯერჯერობით არ აპირებენ. ხვალ, 30 ოქტომბერს კონსორციუმის ხელმძღვანელი, ლევან ახლედიანი პარლამენტში დეპუტატების კითხვებს უპასუხებს.

"კომპანიის წარმომადგენელმა დაადასტურა, რომ Meridian Capital NL B.V-ს მოცემულ ეტაპზე არ გააჩნია ანაკლიის პორტის პროექტში ინვესტორის სახით მონაწილეობის შესაძლებლობა, რისთვისაც ითხოვა საქართველოს მთავრობისგან Meridian Capital NL B.V-ის მოწონების თაობაზე ყველა მიმდინარე პროცედურის შეჩერება. საქართველოს რეგიონული განვითარებისა და ინფრასტრუქტურის სამინისტრო ითვალისწინებს Meridian Capital NL B.V-ის თხოვნას და გამოთქვამს მზადყოფნას მომავალშიც ხელი შეუწყოს სათანადო გამოცდილების, ფინანსური და საქმიანი რეპუტაციის მქონე ყველა ინვესტორს მიიღოს მონაწილეობა ანაკლიის ღრმაწყლოვანი პორტის განვითარების პროექტში", — ნათქვამია სამინისტროს განცხადებაში.

ამერიკული კომპანია Conti International-ის ანაკლიის ღრმაწყლოვანი პორტის პროექტიდან გასვლის შემდეგ, კონსორციუმმა საქართველოს მთავრობას კომპანია Meridian Capital NL B.V. წარუდგინა შესათანხმებლად.