საქართველოს ოფიციალური ვიზიტით ყირგიზეთის რესპუბლიკის პრეზიდენტი ალმაზბეკ ატამბაევი მეუღლესთან და შვილთან ერთად ეწვია. მას თბილისის საერთაშორისო აეროპორტში ოფიციალური პირები დახვდნენ.

"ამ ვიზიტს განსაკუთრებული მნიშვნელობა აქვს, გამომდინარე საქართველოს იმ როლიდან, რომელიც მას აკისრია ევროპასა და აზიას შორის ეკონომიკური თანამშრომლობის უზრუნველსაყოფად" - განაცხადა საქართველოს პრეზიდენტის ადმინისტრაციის უფროსმა გიორგი აბაშიშვილმა.

მოგვიანებით საქართველოს პრეზიდენტის სასახლეში ატამბაევის დახვედრის ოფიციალური ცერემონია გაიმართა.

ფოტო: საქართველოს პრეზიდენტის ადმინისტრაცია

ცერემონიაზე საქართველოს შეიარაღებული ძალების ორკესტრმა ყირგიზეთისა და საქართველოს სახელმწიფო ჰიმნები შეასრულა, რის შემდეგაც პრეზიდენტებმა საქართველოს სახელმწიფო დროშას პატივი მიაგეს და წითელ ხალიჩასთან განლაგებულ საპატიო ყარაულის მწკრივს ჩაუარეს.

ფოტო: საქართველოს პრეზიდენტის ადმინისტრაცია

დახვედრის ოფიციალური ცერემონიის შემდეგ პრეზიდენტები ერთმანეთს პირისპირ შეხვდნენ. შეხვედრისას გიორგი მარგველაშვილმა იმედი გამოთქვა, რომ ყირგიზეთის პრეზიდენტის ალმაზბეკ ატამბაევის პირველი ვიზიტი საქართველოში საქართველო - ყირგიზეთის შემდგომი ურთიერთობების განვითარებას შეუწყობს ხელს.

შეხვედრისას საუბარი შეეხო საქართველოს ოკუპირებულ ტერიტორიებზე შექმნილ ვითარებას და ადამიანის უფლებების დარღვევის ფაქტებს. როგორც საქართველოს პრეზიდენტმა აღნიშნა, ჩვენი ქვეყნის წინაშე კვლავ დგას მცოცავი ოკუპაციის პრობლემა, რომელიც ართულებს ადგილობრივი მოსახლეობის ჰუმანიტარულ მდგომარეობას.

გიორგი მარგველაშვილმა ყირგიზეთის პრეზიდენტს საქართველოს სუვერენიტეტის და ტერიტორიული მთლიანობის მხარდაჭერისათვის მადლობა გადაუხადა.

ფოტო: საქართველოს პრეზიდენტის ადმინისტრაცია

პრეზიდენტების შეხვედრის პარალელურად, საქართველოს პირველმა ლედიმ მაკა ჩიჩუამ ყირგიზეთის რესპუბლიკის პირველ ლედის რაისა ატამბაევას უმასპინძლა. პრეზიდენტის ადმინისტრაციის ცნობით, მათ ორ ქვეყანას შორის კულტურული ურთიერთობების გაღრმავების შესახებ ისაუბრეს, შეხვედრის დასრულების შემდეგ კი, საქართველოს პირველმა ლედიმ სტუმარს ქართული ტრადიციული სამოსის აქსესუარი - ყაბალახი უსახსოვრა.

ატამბაევი საქართველოში ორდღიანი ოფიციალური ვიზიტით იმყოფება.