თბილისში, პეკინისა და ბუდაპეშტის ქუჩების კვეთაზე, ტროტუარზე, ლითონის კონსტრუქციის მშენებლობა მიმდინარეობდა, რომლის დემონტაჟიც, საბურთალოს გამგეობის თქმით, მოქალაქეთა პროტესტის შედეგად გადაწყდა.

პროექტთან დაკავშირებით გაფორმებული ხელშეკრულების თანახმად, რომელიც საბურთალოს გამგეობასა და შპს ფენიქსს შორის არის დადებული, რკინის თეატრის მიმდებარე ტერიტორიაზე სკვერი და თერთმეტი ფანჩატური უნდა მოეწყოთ. პროექტის ღირებულება 194 589 ლარს შეადგენს.

როგორც მოქალაქე ბესიკ ბაღაშვილის მიერ მის Facebook გვერდზე გავრცელებული ფოტოდან ჩანს, აღნიშნული პროექტის ფარგლებში დაწყებული მშენებლობა ტროტუარის თითქმის მთლიან ნაწილს იკავებს.

ხელშეკრულებიდან ირკვევა, რომ აღნიშნულ კვეთაზე მოწყობილი სკვერი 25 მეტრიანი ღობით უნდა შემოსაზღვრულიყო, რომლის კარკასი ლითონის მილებისგან შემდგარ ბადეს წარმოადგენს, რომელიც რკინა-ბეტონის ბორდიურში უნდა ყოფილიყო ჩამაგრებული.

როგორც საბურთალოს რაიონის გამგეობაში On.ge-ს განუმარტეს, პროექტის მშენებლობას, რომლის შესრულებასაც ლითონის კონსტრუქციის ტროტუარზე აშენება სჭირდებოდა, საზოგადოებრივი პროტესტი მოჰყვა, რის გამოც, მისი დემონტაჟი გადაწყდა:

"ეს მშენებლობა არაა, ეს რეალურად კონსტრუქციაა, რომლის დემონტაჟიც გადაწყდა საზოგადოებრივი პროტესტის გამო. მანდ არის რკინის თეატრი, რომლის ირგვლივაც გამწვანებული ზონა კეთდებოდა, რომელზეც სუროს კედელი უნდა ყოფილი, დიზაინერის მიერ ასე იყო დაგეგმილი. ვინაიდან საზოგადოებრივი პროტესტი გამოიწვია, ეს პროექტი შეიცვლება".