დამწვრობის ცენტრის ექიმის, გიორგი დავლიანიძის ინფორმაციით, გურამიშვილის გამზირზე მომხდარი აფეთქების გამო დაშავებულ კაცს სხეულის 60 პროცენტი აქვს დამწვარი. მისივე თქმით, პაციენტის მდგომარეობა უმძიმესია. მის კომენტარს საზოგადოებრივი მაუწყებელი ავრცელებს.

"დამწვრობა მიღებული აქვს ცეცხლის ალით, სავარაუდოდ, შეიძლება მოხდა აფეთქება, ზუსტად ჩვენ არ ვიცით. მდგომარეობა არის უმძიმესი. იმყოფება დამწვრობითი შოკის მდგომარეობაში. მიმდინარეობს ძლიერი ანტიშოკური თერაპია. მდგომარეობა უმძიმესია, ჯერ რაიმე პროგნოზების გაკეთებაზე ლაპარაკი ადრეა. პაციენტს, 39 წლის მამაკაცს დამწვარი აქვს სხეულის 60 პროცენტი. ჭრილობები უბნობრივად არის სხვადასხვა ადგილას გაფანტული, ასევე, აქვს სასუნთქი გზების დამწვრობა", — ამბობს ექიმი.

რაც შეეხება დაშავებულ კიდევ სამ პირს, მათი ჯანმრთელობის მდგომარეობა სტაბილურია. გურამიშვილზე აფეთქება დღეს, 19 ოქტომბერს მოხდა. აფეთქება, სავარაუდოდ, ბუნებრივი აირის გაჟონვამ გამოიწვია. შემთხვევის შედეგად ოთხი ადამიანი დაშავდა.