ისტორიკოსი გიორგი ოთხმეზური აცხადებს, რომ პოლიტიკურად გააქტიურებას გეგმავს და მმართველი პარტიის დეპუტატ გია ჟორჟოლიანთან ითანამშრომლებს. მისი თქმით, სურს შეიქმნას ისეთი ძალა პარლამენტში, რომელიც ნაციონალური მოძრაობასა და ევროპულ საქართველოს "ჩააჩოჩებს".

"გია [ჟორჟოლიანი] წესიერი და აზრიანი კაცია. საკმაოდ კარგი პროგრამა და აზრები აქვს ძალიან. მე ყველანაირად შევეცდები, რომ მხარი დავუჭირო. ჯერ ცოტა ადრეა საუბარი რაღაც დეტალებზე", — განაცხადა მან.

ოთხმეზურმა არ უპასუხა კითხებს პრეზიდენტ სალომე ზურაბიშვილის შესახებ, რომელმაც მისი შვილის მკვლელობისთვის გასამართლებული ასლან ბეჟანიძე შეიწყალა. 18 წლის დათო ოთხმეზური 2004 წლის 27 ოქტომბერს თბილისში მოკლეს. მკვლელობისთვის ასლან ბეჟანიძე 2016 წლის 26 მარტს დააკავეს. 2018 წლის 29 მარტს, საქართველოს უზენაესი სასამართლოს მიერ გამოტანილი განაჩენის საფუძველზე, ასლან ბეჟანიძეს განზრახ მკვლელობისთვის სასჯელის სახედ და ზომად განესაზღვრა 9 წლით თავისუფლების აღკვეთა, რაც 2012 წლის 28 დეკემბრის "ამნისტიის შესახებ" საქართველოს კანონის გამოყენებით შეუმცირდა და საბოლოოდ განესაზღვრა თავისუფლების აღკვეთა 6 წლის და 9 თვის ვადით.