მარიამ კუბლაშვილი ბოლო დროის ერთ-ერთი ყველაზე გახმაურებულ საქმეში ბრალდებული მხარის უფლებადამცველია. მან სექსუალური ძალადობის საქმეზე დაზარალებულად აღიარებულ ქალზე საუბრისას გამოიყენა შეფასებები: "ჭორაობს", "სუსტი სქესია". როგორ ჰგონია, არის თუ არა ეს შეფასებები სექსისტური — ამ საკითხზე On.ge მარიამ კუბლაშვილს ესაუბრა.

"ჭორაობა"

"კაცია [და] ვერ იჭორავებს, რა... არ გამოსდის ამ კაცს ჭორაობა ქალზე. მე ქალი ვარ [და] აი მაგას დავამთავრებ და დავასამარებ სამუდამოდ, რა... მაგათ ტყუილებს და აფერისტობას გავაგებინებ მთელ საქართველოს", — თქვა კუბლაშვილმა პრაიმტაიმთან საუბრისას.

კითხვაზე, მისი ნათქვამი აღვივებს თუ არა საქართველოში სტერეოტიპს, რომ "ქალები ჭორაობენ", კუბლაშვილი ასე პასუხობს:

"მე არ ვსაუბრობ, რომ ქალები ჭორაობენ. კონკრეტული მოცემულობა ვთქვი, რომელიც წარმოდგენილი იქნა დაზარალებული მხარის მიერ. მან დაიწყო საუბარი და ისაუბრა ძალიან პირადული დეტალები".

"სუსტი სქესი"

"მისი ოპონენტი არის ქალბატონი, სუსტი სქესის წარმომადგენელი", — თქვა კუბლაშვილმა სექსუალური ძალადობის სავარაუდო მსხვერპლზე.

კითხვაზე, როგორ ჰგონია, არიან თუ არა ქალები სუსტი სქესის წარმომადგენლები და რატომ იყენებს ამ ტერმინს, კუბლაშვილი ასე პასუხობს:

"ჩემი მხრიდან ქალზე სუსტი სქესის ხსენება ნამდვილად არ არის სწორი და უნდა ვაღიაროთ... რატომ ვუსვამდი, როგორც ჩანს, ჩემს ქვეცნობიერში ხაზს [სუსტ სქესს], აქ იყო ცემაზე და სექსუალურ ძალადობის მცდელობაზე... რას ვგულისხმობდი სისუსტეში, მას ძალადობისგან თავის დაღწევის საშუალება, ფიზიკური სიძლიერიდან გამომდინარე გაუჭირდებდა.

ჩემი ქვეცნობიერი ხსნის, რომ ის არის სუსტი... გამომივიდა ძალიან ცუდი ინტერპრეტაცია... რომ ვნახე მე თვითონ გავბრაზდი ჩემს თავზე..."