16 ოქტომბერს ფრანგული სამოდელო სახლის, დიორის ოფიციალურმა წარმომადგენელმა სტუდენტებთან გამართულ პრეზენტაციაზე ჩინეთის რუკის ისეთი ვერსია წარმოადგინა, რომელზეც ტაივანის ტერიტორია არ იყო მონიშნული.

ტაივანი დე ფაქტო სუვერენული ქვეყანაა, რომლის დამოუკიდებლობასაც ქვეყნების უმრავლესობა არ აღიარებს და მას ჩინეთის ნაწილად მიიჩნევენ. ჩინეთსა და ტაივანს შორის ამ დრომდე დაძაბული ურთიერთობაა.

დიორის ამ ქმედებამ დიდი კრიტიკა გამოიწვია ჩინურ სოციალურ მედია Weibo-ზე, რომელიც ტვიტერის ჩინური ანალოგია და მილიონობით მომხმარებელი ჰყავს.

ასეთი გამოხმაურების გამო სამოდელო სახლს ბოდიშის მოხდა მოუწია:

"დიორი ყოველთვის პატივს სცემდა ჩინეთის ერთიანობასა და სიმტკიცეს. ბოდიშს ვიხდით ჩვენი თანამშრომლის მიერ დაშვებული შეცდომის გამო, რომელსაც არასწორი ინტერპრეტაცია მიეცა".

მართალია, კომპანიამ პასუხისმგებლობა მხოლოდ ერთ პირს დააკისრა, მაგრამ მსგავსი რამ ისეთი სამოდელო სახლების შემთხვევაშიც განმეორებულა, როგორებიცაა Givenchy, Coach და Versace.