მთავრობამ დაადასტურა, რომ აბასთუმანში, სადაც ბიძინა ივანიშვილს აქვს ინტერესები, საჰაერო მარშრუტები შეიცვლება. 17 ოქტომბრის მთავრობის სხდომაზე ეკონომიკის მინისტრმა, ნათია თურნავამ განაცხადა, რომ მარშრუტების "მცირედი კორექტირება" მოხდა, ამის საფუძვლად კი აბასთუმნის ობსერვატორიის მიმართვა დაასახელა.

"აქ არ არის საუბარი არანაირ საერთაშორისო მარშრუტებზე. იმდაგვარად, რომ დროებით შეზღუდვის 8-კილომეტრიანი არეალი დაწესებულიყო, თან იმდაგვარად, რომ არცერთი თეთრი არ იკარგება ამით, არცერთი საერთაშორისო მარშრუტი არ გადის, რასაკვირველია, ჩვენ ამას დავუჭირეთ მხარი", — ამბობს მინისტრი.

ერთი კვირის წინ აბასთუმნის საჰაერო ტრასის გადაკეტვის შესახებ მთავარ არხზე გავიდა სიუჟეტი სახელწოდებით: "ივანიშვილის გადაკეტილი ცა". მათთან საუბარში ქართული ოცნების დეპუტატმა რომან კაკულიამ თქვა, რომ მისი ინფორმაციით, ეს ინიციატივა ეკოლოგიას უკავშირდება:

"მე, როგორც ვიცი, ეკოლოგიასთან დაკავშირებული თემებია, კურორტის სტატუსიდან გამომდინარე და მის მიმზიდველობასთან დაკავშირებით, სამომავლოდ".

ოპოზიცია ამ ინიციატივას "ივანიშვილის ახირებად" აფასებს. ნაციონალური მოძრაობის წევრი ზაალ უდუმაშვილი ამბობს, რომ "ფეოდალურ მმართველობასთან" გვაქვს საქმე:

"ჩვენ ვცხოვრობთ ქვეყანაში, რასაც მართლა ფეოდალი მართავს. ცოტა ხნის წინ ადამიანმა ზღვა მიიერთა, აღარ ვსაუბრობ იმ მილიონობით კვადრატულ მიწაზე, რომელიც მიტაცებული აქვს, ახლა კი გადაწყვიტა ჰაერიც მიიერთოს".

ევროპული საქართველოს დეპუტატი, სერგი კაპანაძე ამბობს, რომ თუ ასეთი მოთხოვნა მართლაც შევიდა ავიაციის სააგენტოში, დადასტურდება რომ "ხელისუფლება ივანიშვილის ხუშტურებზე დადის".

"თუ რაღაც სერიოზული არგუმენტი არ აქვს ქვეყანას, იქნება ეს უსაფრთხოების გამოწვევები, მნიშვნელოვანი პროცესები, რაც გარკვეულ საფრთხეს უქმნის გადაფრენებს, ამის გარდა რაიმე სხვა არგუმენტით თუ მოითხოვენ... მე ასეთი რამ არ მსმენია".

2 ოქტომბერს მთავრობის დადგენილებით, ილიას სახელმწიფო უნივერსიტეტს აბასთუმნის ობსერვატორიის მართვის უფლება ჩამოერთმევა. მთავრობის გადაწყვეტილებით ილიაუნის სტრუქტურაში შემავალი დამოუკიდებელი სამეცნიერო-კვლევითი ერთეული ცალკე სსიპ-ად ჩამოყალიბდება. ობსერვატორიაზე სახელმწიფო კონტროლს განათლების სამინისტრო განახორციელებს.

ბიძინა ივანიშვილმა მისი ინტერესები აბასთუმნის მიმართ ერთი წლის წინ ინტერვიუს დროს დაადასტურა, როდესაც თქვა, რომ სურს "ჩაატაროს ექსპერიმენტი და აბასთუმანი ელექტრომანქანების რეგიონად აქციოს".

2018 წლის აგვისტოში ბიძინა ივანიშვილი აბასთუმანში ოჯახთან ერთად იყო ჩასული. როგორც მედიაში ვრცელდებოდა ინფორმაცია, ის კურორტზე ადგილობრივ მდგომარეობას ეცნობოდა. მან აბასთუმნის ობსერვატორიის სარეაბილიტაციო სამუშაოები დაათავლიერა. გარდა ამისა, ვრცელდებოდა ინფორმაცია, რომ ივანიშვილს აბასთუმანში ახალი პროექტების განსახორციელებლად ჩავიდა.