ჭყონდიდის მიტროპოლიტმა პეტრემ უკრაინის ავტოკეფალიის აღიარებაზე საქართველოს საპატრიარქოს პოზიცია შეაფასა და მას "ფარისევლური პოზიცია" უწოდა. საბერძნეთის ეკლესიის მიერ უკრაინის ავტოკეფალიის აღიარებაზე მეუფე პეტრემ დღეს, 13 ოქტომბერს TV პირველზე ვახო სანაიას დღის ამბებში ისაუბრა:

"მე დიდი სურვილი მქონდა, პირველები ჩვენ ვყოფილიყავით... სინოდის ასეთი პოლემიკა ამ თემაზე, ჩემი პირადად საქართველოს კათოლიკოს-პატრიარქთან ამ თემაზე, როდესაც მან ბრძანა, რომ ჩვენ უნდა ვიყოთ ფრთხილები, რომ არც რუსებს ვაწყენინოთ და არც ბერძნებს, მე მას ვუთხარი, მთავარია ღმერთს არ ვაწყენინოთ".

მიტროპოლიტმა აღნიშნა, რომ სინოდში მრავლად არიან ადამიანები, რომლებიც პატრიარქის პოზიციას არ იზიარებენ:

"ისინი ფიქრობენ, რომ საქართველომ დროულად უნდა გადადგას ნაბიჯი და არ დაელოდოს სხვას.... ჩვენ გვმართებს, რომ მაგალითი მივცეთ დანარჩენ მართლმადიდებელ სამყაროს".

ჭყონდიდელი მიტროპოლიტი "შერჩევით სამართალს" უწოდებს იმას, რომ საქართველოს საპატრიარქო საფრთხეს ხედავს აფხაზეთთან მიმართებით:

"ესეც მცდელობაა საკუთარი მიზნების გამართლების. მე პირადად როგორც მიტროპოლიტი, ერთადერთი რასაც განვიხილავდი და ერისა და ღვთის წინაშე ავიღებდი პასუხისმგებლობად, თუ რუსეთი თანახმა იქნება, პოლიტიკურად უკან წაიღოს აფხაზეთისა და ცხინვალის რეგიონების აღიარებაზე, მხოლოდ ამ შემთხვევაში შეიძლება წავიდეთ მათთან დათმობაზე. მე პირადად სხვა დამოკიდებულება მიმაჩნია მხოლოდ უპრინციპობად".

გუშინ 12 ოქტომბერს გავრცელდა ინფორმაცია, რომ საბერძნეთის მართლმადიდებელი ეკლესიის წმინდა სინოდმა, საგანგებო სხდომაზე უკრაინის ეკლესიის ავტოკეფალია აღიარა. საბერძნეთის ეკლესიის პატრიარქმა, არქიეპისკოპოსმა იერონიმმა წარადგინა პრეზენტაცია უკრაინის ეკლესიის ავტოკეფალიის შესახებ, რის შემდეგაც გადაწყვეტილება კენჭისყრით მიიღეს.

უკრაინის ეკლესია საქართველოს მხარდაჭერის მოლოდინში

6 იანვარს სტამბოლში წმინდა გიორგის ტაძარში მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს ტომოსი ანუ ბრძანება გადასცა. ამით, უკრაინის ეკლესია ოფიციალურად გამოეყო რუსეთის ეკლესიას და ფორმალურად გაფორმდა ოქტომბერში მიღწეული შეთანხმება, ავტოკეფალიის მინიჭებაზე. პასუხად რუსეთის საპატრიარქომ განაცხადა, რომ მსოფლიო პატრიარქს ლოცვებში აღარ მოიხსენიებს.

კიევის პატრიარქმა, ფილარეტმა ჯერ კიდევ სექტემბერში, ავტოკეფალიის მინიჭებაზე შეთანხმების მიღწევამდე განაცხადა, რომ საქართველოს მხარდაჭერას ელოდება. "საქართველოს ეკლესიას უნდა ახსოვდეს თავისი ისტორია", — აღნიშნა მან.

თუმცა, საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდებოდა. მაშინ პატრიარქის მდივანმა, მიქაელ ბოტკოველმა აღნიშნა, რომ საკითხზე სინოდის სხდომაზე იმსჯელებდნენ. თუმცა, მანვე აღნიშნა, რომ ოკუპაციის პირობებში კონსტანტინოპოლის ეკლესიის უპირობო მხარდაჭერა არასწორი იქნებოდა.

ავტოკეფალიის საკითხზე იშვიათად საუბრობდა თავად პატრიარქი ილია მეორეც. ერთ-ერთი ქადაგებისას მან იმედი გამოთქვა, რომ კონსტანტინოპოლისა და რუსეთის პატრიარქები გამონახავდნენ საერთო ენას და "მწუხარება სიხარულად გარდაიქცეოდა".

მას შემდეგ რაც უკრაინის ავტოკეფალია ოფიციალურად გამოფრმდა, ახალქალაქისა და კუმორდის მიტროპოლიტმა აღიარების პროცესის გაწელვის მიზეზად ის დაასახელა, რომ ტომოსი არ წაუკითხავთ.

მოსკოვის საპატრიარქოს საგარეო ურთიერთობების განყოფილების თავმჯდომარემ, მიტროპოლიტმა ილარიონ ალფეევმა ერთ-ერთ ინტერვიუში იმ საფრთხეებზე ისაუბრა, რაც საქართველოს ეკლესიას უკრაინის ავტოკეფალიის აღიარების შემთხვევაში ელოდებოდა. საქართველოს საპატრიარქოში განაცხადეს, რომ ილარიონის განცხადება ორაზროვანია და მუქარის შინაარსი აქვს. მათი თქმით, ცდილობნენ გადაწყვეტილება პოლიტიკური ნიშნით არ მიეღოთ.

20 თებერვალს ილია მეორე უკრაინის ეკლესიის მოსკოვის საპატრიარქოს საგარეო განყოფილების ხელმძღვანელს, ბორისპოლისა და ბროვარსკის მიტროპოლიტ ანტონს და მის თანმხლებ პირებს შეხვდნენ. როგორც საპატრიარქო განაცხადეს, ეს არაფორმალური შეხვედრა იყო და მოსკოვის საპატრიარქოს წარმომადგენლებმა უკრაინაში მიმდინარე მოვლენებთან დაკავშირებით თავიანთი პოზიცია გააცნეს.