ჯერ კიდევ რამდენიმე დღის წინ ცნობილმა ბრიტანელმა ხელოვანმა, ბენქსიმ ლონდონში მაღაზია გახსნა, რომელმაც თავისი უცნაური კონცეფციით დიდი დაინტერესება გამოიწვია. სულ ახლახანს კი მან კვლავ მოახერხა ყურადღების ეპიცენტრში მოქცევა: მისი ერთ-ერთი ყველაზე ცნობილი ნამუშევარი სოთბის აუქციონზე 9,8 მილიონ ფუნტ სტერლინგად გაიყიდა, რაც 12,2 მილიონი დოლარის ეკვივალენტია.

სატირული შინაარსის მქონე ნახატი, რომელიც ბენქსიმ 2009 წელს ზეთის საღებავებით, დაახლოებით, ოთხი მეტრის სიგრძის ტილოზე დახატა, ინგლისის პარლამენტში შიმპანზეების სხდომას ასახავს. თავად ხელოვანის განცხადებით, ეს იყო ერთგვარი რეფლექსია დიდ ბრიტანეთში ბრექსიტთან დაკავშირებით მიმდინარე პროცესებზე.

ნახატი აუქციონის გამოცხადებიდან 13 წუთში გაიყიდა და მან ბენქსის აქამდე გაყიდულ ნამუშევრებს შორის რეკორდულ ღირებულებას მიაღწია: ნახატის საწყისი ფასი 2 მილიონი ფუნტი სტერლინგი იყო, თუმცა ის ხუთჯერ მეტ ფასად გაიყიდა.

ამ ფაქტს თავადაც ხელოვანიც გამოეხმაურა ინსტაგრამის საშუალებით:

"წუხელ ბენქსის ნახატი აუქციონზე რეკორდულ ფასად გაიყიდა. რა სირცხვილია, რომ მისი მფლობელი მე აღარ ვარ."