საქართველოს პრეზიდენტი, სალომე ზურაბიშვილი ამბობს, რომ მისთვის მიუღებელია სექსისტური განცხადება. ლელოს დამფუძნებლის, მამუკა ხაზარაძის მიერ ინფრასტრუქტურის მინისტრის, მაია ცქიტიშვილის მიმართ გამოთქმულ სექსისტურ განცხადებას პრეზიდენტი Facebook-ზე გამოეხმაურა.

"ქალის მიმართ დამამცირებელი და დამაკნინებელი კომენტარები მთელ მსოფლიოში დასჯადი ხდება და მით უმეტეს მიუღებელია ქართული კულტურისა და ტრადიციებისთვის. მსგავსი კომენტარი იქნება თუ პირადი ცხოვრების ამსახველი კადრების მუდმივი ტირაჟირება ან კიდევ შეურაცხყოფის მიყენების სხვადასხვა ფორმა, რეალურად ჩვენ საზოგადოებას ამცირებს და არ გვეკადრება", — წერს ზურაბიშვილი.

ბევრად უფრო ადრე, შუალედური არჩევნების დროს ქართული ოცნების მაშინდელმა პოლიტიკურმა მდივანმა, ახლა უკვე თავდაცვის მინისტრმა, ირაკლი ღარიბაშვილმა სექსისტური შინაარსის განცხადება გაავრცელა, რასაც პრეზიდენტი არ გამოეხმაურა:

"მე მინდა ერთი რჩევა მივცე ქალბატონ სანდრას [რულოვსი], რომელიც ჩვენი კანდიდატის ოპონენტი იყო: დაისვენეთ, მე მას ვურჩევდი, რომ მიხედოს თავის მეუღლეს და ჩვენ მივხედავთ ქვეყანას."