მერიის მიერ ჩატარებული ტენდერების შედეგად მიღებულმა ეკონომიამ 2015 წელს 20 მილიონ ლარზე მეტი შეადგინა. ამის შესახებ, თბილისის მერმა დავით ნარმანიამ 24 თებერვალს მერიაში გამართულ დედაქალაქის მთავრობის სხდომაზე განაცხადა. მერიის ინფორმაციით, 2015 წელს დედაქალაქის მერიამ, წინა წელთან შედარებით, რაოდენობრივად 26%-ით მეტი ტენდერი გამოაცხადა.

დედაქალაქის მერის განცხადებით, ბიუჯეტი 2015 წელს გადაჭარბებით შესრულდა და 101% შეადგინა, ხოლო ხარჯვითი ნაწილის მაჩვენებელმა, ათვისების - 97%. როგორც ნარმანია ამბობს, ბიუჯეტის შესრულების მსგავსი მაღალი მაჩვენებელი არ დაფიქსირებულა უკანასკნელი 3 წლის განმავლობაში.

დავით ნარმანიას ცნობით, 2015 წელს ბიუჯეტის ანგარიშზე დარჩენილი ნაშთიდან თანხები მიმართული იქნება როგორც კეთილმოწყობის სამსახურის სამუშაოებზე, ასევე, ისეთი მასშტაბური პროექტების დასაფინანსებლად, როგორიცაა: მეტროს მოდერნიზაცია, ქალაქში ახალი სანათი წერტილების მოწყობა, ლილოს ნაგავსაყრელზე გაზშემკრები სისტემის მოწყობა, სტიქიასთან დაკავშირებული ღონისძიებების დაფინანსება და ა.შ.