საერთაშორისო უფლებადაცვითი ორგანიზაცია Amnesty International კლიმატის ცვლილებების თინეიჯერი აქტივისტის, გრეტა თუნბერგის წინააღმდეგ დაწყებულ დისკრედიტაციის კამპანიასა და ბულინგს გამოეხმაურა. ორგანიზაციის თქმით, მათმა მოკვლევამ აჩვენა, რომ კლიმატის პრობლემა იწვევს ძალადობის ტალღას და ის განსაკუთრებით სახიფათოა ქალებისა და გოგოებისთვის.

"თქვენ გაქვთ უფლება არ ეთანხმებოდეთ მიზეზს, თუ ასე გსურთ, მაგრამ სიძულვილი ახლავე უნდა შეწყდეს!" — წერს Amnesty International და გრეტას ფოტოს აქვეყნებს, რომელსაც აწერია "ჩვენ გრეტას გვერდით ვართ".

ფოტო: Amnesty International UK

გრეტა თუნბერგი კლიმატის ცვლილების აქტივიზმის მთავარ სახედ იქცა. 2018 წელს მან სტოკჰოლმში, პარლემენტის შენობასთან აქცია მოაწყო და უარი თქვა პარასკეობით სკოლაში სიარულზე, სანამ ხელისუფლება პარიზის შეთანხმების შესრულებას არ დაიწყებდა. თუნბერგის აქციამ დიდი ყურადღება მიიპყრო და მას სხვა მოსწავლეებიც შეუერთდნენ. ამის შემდეგ მას ხშირად იწვდნენ კონფერენციებსა და აქციებში მონაწილეობისთვის. ის მშვიდობის დარგში ნობელის პრემიაზეც წარადგინეს.

23 სექტემბერს მან გაეროს გენერალური ასამბლეის გახსნაზე კლიმატის ცვლილებასა და მსოფლიო ლიდერების მხრიდან უყურადღებობაზე ისაუბრა.

"ყველაფერი ეს არასწორია. მე აქ არ უნდა ვიყო, სკოლაში უნდა დავბრუნებულიყავი. თქვენი ფუჭი საუბრით მომავალი და ბავშვობა წამართვით. მასობრივი გადაშენება იწყება, მაგრამ ერთადერთი რაზეც საუბრობთ, ფული და ზღაპრებია უსასრულო ეკონომიკურ ზრდაზე. როგორ ბედავთ?!" — აღნიშნა თუნბერგმა ემოციური გამოსვლისას.

სწორედ ეს გამოსვლა გახდა სოციალურ ქსელში კრიტიკისა და ბულინგის ობიექტი.

ამავე თემაზე: