Pose რაიან მერფის კიდევ ერთი პოპულარული სერიალია, რომლის სიუჟეტიც 80-იან წლების ნიუ-იორკში ვითარდება და რომელიც გუშინ, 22 სექტემბერს, Emmy 2019-ის ყურადღების ცენტრშიც მოექცა.

საქმე ის არის, რომ სერიალის ერთ-ერთი მთავარი როლის შემსრულებელი, ბილი პორტერი "საუკეთესო მამაკაცი მსახიობი დრამატულ სერიალში" კატეგორიის გამარჯვებული გახდა, რითაც ერთდროულად ემისა და LGBTQ ადამიანების ისტორიაში, სრულიად ახალი ფურცელი დაწერა.

დიახ, Emmy Awards-ის ისტორიაში პირველად გაიმარჯვა ღიად გეი, შავკანიანმა მსახიობმა და ამ ფაქტით გახარებულმა ბილმა დამსახურებული ჯილდო სცენაზე შეძახილით მიიღო.

"მე მაქვს უფლებები, თქვენ გაქვთ უფლებები, ჩვენ ყველას გვაქვს უფლებები", — თქვა მსახიობმა თავისი სიტყვით გამოსვლისას.

შეგახსენებთ, რომ ამავე კატეგორიაში ნომინირებულები იყვნენ: ჯეისონ ბეიტმენი (Ozark),
სტერლინგ ბრაუნი (This Is Us), კიტ ჰარინგტონი (Game of Thrones), ბობ ოდენკირკი (Better Call Saul) და მილო ვენტიმილია (This Is Us).