ეროვნულ-დემოკრატიული ინსტიტუტის (NDI) კვლევის მიხედვით, საქართველოს მართლმადიდებლური ეკლესიის საქმიანობას მეტი აფასებს დადებითად, ვიდრე პრემიერს, პრეზიდენტსა და პარლამენტის თავმჯდომარეს ერთად. კვლევის მონაცემებით, 64 პროცენტი აფასებს ეკლესიის საქმიანობას "კარგად", ხოლო 5 პროცენტი "ცუდად".

NDI-ის კვლევით ჩანს, რომ მაღალი თანამდებობის პირებიდან თბილისის მერი კახა კალაძე ერთ-ერთი ყველაზე რეიტინგულია. მის საქმიანობას გამოკითხულთა 45 პროცენტი აფასებს დადებითად. მიუხედავად ამისა, ისიც ჩამორჩება მართლმადიდებლური ეკლესიის საქმიანობის დადებითად შეფასების ნიშნულს.

კახა კალაძეს ჩამორჩებიან თანამდებობის სხვა პირები აღმასრულებელი და საკანონმდებლო ხელისუფლებიდან. გამოკითხულების 14 პროცენტი აფასებს საქართველოს პრემიერ-მინისტრის (მამუკა ბახტაძის) საქმიანობას დადებითად. ეს თითქმის 5-ჯერ ნაკლებია, ვიდრე ეკლესიის საქმიანობის დადებითად შემფასებლების რაოდენობა. კვლევისას გამოკითხულთა, ასევე, თითქმის 5-ჯერ ნაკლები, 12 პროცენტი აფასებს დადებითად პრეზიდენტის საქმიანობას, რაც შეეხება პარლამენტის თავმჯდომარეს, მისი საქმიანობის შესაფასებლად დასმულ კითხვაზე "კარგად" პასუხობს 10 პროცენტი. კვლევა პარლამენტის თავმჯდომარის თანამდებობაზე არჩილ თალაკვაძის დანიშვნიდან რამდენიმე დღეში ჩატარდა.

კვლევა 2019 წლის 13-29 ივლისის პერიოდში ჩატარდა. გამოიკითხა საქართველოს მასშტაბით 2 131 ადამიანი პირისპირ ინტერვიუს წარმომადგენლობითი შერჩევის საფუძველზე. გამოკითხვის საშუალო ცდომილების ზღვარი არის +/- 1,7%.