Breaking Bad-ის სიქველი ფილმი, El Camino, ნეტფლიქსზე 11 ოქტომბერს გამოვა, თუმცა ფანებს შოუს ერთ-ერთი მთავარი გმირი დახურულ პრემიერაზე ეპატიჟება.

ჯესი პინკმენის ენით ამეტყველებულმა (Yo Bitch!) აარონ პოლმა საკუთარი სახლის უკანა ეზოში გადაღებული ვიდეო ინსტაგრამზე გამოაქვეყნა და შოუს ფანები პირდაპირ პირდაპირ ლოს-ანჯელესში დაპატიჟა.

შერჩეულ იღბლიანებს, რომელსაც თან მეგობრის, მტრის ან ქიმიის მასწავლებლის წაყვანა შეეძლებათ, პინკმენი აეროპორტში შევროლე ელ კამინოთი დახვდება (სწორედ ამ მანქანით გააღწია სამშვიდობოს ჯესიმ თითქმის 1-წლიანი ტყვეობის შემდეგ) და 4-ვარსკვლავიან სასტუმროში წაიყვანს. მანქანით სეირნობის გარდა, ისინი პოლთან ერთად უყურებენ ელ კამინოს, გაიგებენ, რა ბედი ეწია ჯესი პინკმენს, ხოლო ოფიციალურ პრემიერაზე წითელ ხალიჩაზე გაყვებიან და პოლთან და ვინს გილიგანთან ერთად სელფებს გადაიღებენ.

მონაწილეობისთვის აუცილებელია განაცხადის შევსება და კონკურსში უფასოდ ჩართვა, ან სურვილის შემთხვევაში, მონაწილეობასთან ერთად ქველმოქმედებაც.

ფილმის ანონსში ვხედავთ პოლიციის შენობას, რომელშიც ჰენკის პორტრეტია გამოკრული. ჯესის ყოფილი მეგობარი, გამხდარი პიტი დაკითხვაზეა და სამართალდამცავებს უცხადებს, რომ ჯესის შესახებ არაფერი იცის, თუმცა დასძენს, რომ, რომც იცოდეს, მათ არაფერს იტყოდა.

El Camino: A Breaking Bad Movie-ის რეჟისორი სერიალის შემქმნელი ვინს გილიგანია. სწორედ მას ეკუთვნის ფილმის სცენარიც. სავარაუდოდ, ნეტფლიქსზე გამოსვლიდან ცოტა ხნის შემდეგ ფილმი AMC-ზეც გამოჩნდება — სწორედ არხზე გადიოდა ლეგენდარული სერიალი 2008-დან 2013 წლამდე.