ბიზნესმენი მამუკა ხაზარაძის თქმით, თუ ორ თვეში ანაკლიის პროექტთან დაკავშირებით ყველა მხარე არ შეჯერდება, პორტი ვერ აშენდება. ამის შესახებ მან გადაცემა პოლიტ-ქალაქში ისაუბრა.

"თუ არ მოხდა ყველა მხარის შეჯერება, ეს არის ბანკები, ინვესტორები, სახელმწიფო და ა.შ. ანაკლიის თემა გადაიდება იმ მოტივით, რომ ვერ შევთანხმდით, ანუ ვერ აშენდება", — აღნიშნა ხაზარაძემ.

მისივე თქმით, ანაკლიის განვითარების კონსორციუმმა ყველა პირობა შეასრულა და ინვესტორებთან დაკავშირებულ ინფორმაციას ინფრასტრუქტურის სამინისტროს 15 ოქტომბერს წარუდგენს. რაც შეეხება კონსორციუმიდან კონტი ჯგუფის გასვლას ხაზარაძემ განაცხადა, რომ ბოლო წელიწად-ნახევრის განმავლობაში კომპნიას ხელისუფლებიდან არავინ შეხვედრია:

"წარმოიდგინეთ, რომ ხართ 110 წლის კომპანია. ინფრასტრუქტურული პროექტების განხორციელების კუთხით გაქვთ გამოცდილება მსოფლიოს მასშტაბით. ჩადიხართ ამერიკიდან ისეთ ქვეყანაში, როგორიც საქართველოა, რომელიც ვერ დაიკვეხნის მსხვილი ინვესტორების რაოდენობით. ამ კომპანიის მეოთხე თაობის წარმომადგენელი ხართ. ქართულ კომპანიებთან ერთად იგებ საერთაშორისო ტენდერს და ბოლო წელიწად-ნახევრის განმავლობაში არც ერთი მინისტრი და არც ერთი მოხელე არასდროს არ გხვდება. თან, მის სახელს ახსენებ მედიაში და პარლამენტში. გზავნილი არის ის, რომ არ გვაინტერესებ რისთვის ხარ ჩამოსული".

თიბისის საქმე და ანაკლიის პორტი

ანაკლიის პორტის სამომავლო განხორციელებასთან დაკავშირებით კითხვები თიბისი ბანკის საქმემ გააჩინა. თიბისი ჰოლდინგ საქართველო ანაკლიის განვითარების კონსორციუმის წევრია. მას შემდეგ, რაც პროკურატურამ ფულის შესაძლო გათეთრებასთან დაკავშირებით გამოძიება დაიწყო თიბისი ბანკის სამეთვალყურეო საბჭოს წევრებმა, ბადრი ჯაფარიძემ და მამუკა ხაზარაძემ ივარაუდეს, რომ ეს პროცესები ანაკლიის პორტის პროექტის ჩაშლისკენ იყო მიმართული. პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს.

ამ საქმესთან დაკავშირებით 13 თებერვალს საქართველოს ეროვნულმა ბანკმა თიბისი ბანკში მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

ეროვნული ბანკის მოთხოვნის შემდეგ კომპანიის საბაზრო კაპიტალიზაცია 7,29 პროცენტით შემცირდა, რეალურ თანხაში ეს მაჩვენებელი 55 მილიონზე მეტი გირვანქა სტერლინგია.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭვირვალობაზე.

მოგვიანებით, მაშინდელმა ეკონომიკის მინისტრმა, გიორგი ქობულიამ თქვა, რომ თიბისის დამფუძნებლების, მამუკა ხაზარაძისა და ბადრი ჯაფარიძის ირგვლივ შექმნილი ნეგატიური ფონი, კერძო ინვესტორებს "მინიმალური კაპიტალის" შეგროვებას ურთულებს "ანაკლიის პროექტის დასაძრავად".

შემდგომში უკვე მამუკა ხაზარაძემ და ბადრი ჯაფარიძემ ანაკლიის პორტის მმართველ საბჭოში თავმჯდომარისა და თავმჯდომარის მოადგილის პოსტები დატოვეს.

2019 წლის აგვისტოში ანაკლიის განვითარების კონსორციუმი ერთ-ერთმა მთავარმა ინვესტორმა, ამერიკულმა კონტი ჯგუფმა დატოვა. კონსორციუმის აღმასრულებელი დირექტორი, ლევან ახვლედიანი აცხადებდა, რომ კონტი ჯგუფის გასვლა პროექტს მნიშვნელოვნად არ დააზიანებს. მისივე თქმით, ბოლო პერიოდში კონტი ჯგუფს ისედაც ძალიან პასიური როლი ჰქონდა.