ახალდანიშნულმა პრემიერ-მინისტრმა, გიორგი გახარიამ მთავრობის სხდომამდე ბრიფინგების ფორმატი გააუქმა. გახარიას გადაწყვეტილებით, სხდომის დაწყების წინ მედიას პრემიერის მიმართვის ჩაწერის საშუალება ექნება, თუმცა დღევანდელისგან განსხვავებით სხდომა პირდაპირ ეთერში არ გავა. ამის შესახებ On.ge-ს მთავრობის პრესსამსახურმა განუცხადა.

გარდა ამისა, გახარიას თქმით, მთავრობის სხდომები ხუთშაბათობით, დილის ათ საათზე გაიმართება. მისივე თქმით, ყოველი სხდომის შემდეგ მინისტრები მედიასთან ჩავლენ და არამხოლოდ სხდომაზე განხილულ საკითხებზე ისაუბრებენ, არამედ საზოგადოებისთვის საინტერესო სხვა კითხვებსაც უპასუხებენ. თუმცა, უცნობია უპასუხებს თუ არა ჟურნალისტების კითხვებს თავად პრემიერი.

სხდომამდე ბრიფინგების ფორმარტის ინიციატორი ძველი პრემიერ-მინისტრი მამუკა ბახტაძე იყო. წინა პრემიერები, გიორგი კვირიკაშვილი და ირაკლი ღარიბაშვილი მედიასთან ბრიფინგს, ასევე, არ მართავდნენ. მსგავსი პრაქტიკა ჰქონდა ბიძინა ივანიშვილსაც, თუმცა მთავრობის სხდომის ფარგლებს გარეთ ის მედიისთვის ფართო პრესკონფერენციას ატარებდა.

მამუკა ბახტაძე ფეისბუქით ორ სექტემბერს გადადგა, მეორე დღეს კი ცნობილი გახდა, რომ პრემიერობის კანდიდატი შს მინისტრი, გიორგი გახარია იქნებოდა. მთავრობის დამტკიცების პროცედურა ერთი კვირის განმავლობაში პროტესტისა და აქციების ფონზე მიმდინარეობდა. როგორც #სირცხვილიას აქტივისტები, ისე ნაციონალური მოძრაობისა და ევროპული საქართველოს მხარდამჭერები და წევრები სასტვენებითა და შეძახილებით პრემიერმინისტრის პოსტზე გახარიას კანდიდატურას აპროტესტებდნენ. კენჭისყრის პარალელურად პარლამენტთან #სირცხვილიას წევრებმა ცხვრები მოიყვანეს, ქართული ოცნების დეპუტატების სიმბოლოდ.

გახარიასა და მისი მთავრობის მოსმენა ყველაზე მწვავე ოპოზიციის ფორმატში იყო. ნაციონალურმა მოძრაობამ მას სიმღერა "გახარიას უხარია" მოასმენინა, შემდეგ პასუხებს არ მოუსმინა და სხდომა დაამთავრა. ევროპულმა საქართველოს კითხვების სტრატეგია აირჩია. მთავარი თემა 20-21 ივნისის აქცია იყო. კანდიდატის პასუხები არც მათ მოისმინეს და სხდომა დახურეს. ოპოზიციის პასუხად გახარიამ თქვა, რომ "მათ დაასრულებს". ქართული ოცნება გახარიას მთავრობის პროგრამაში პოზიტივზე ამახვილებენ ყურადღებას და ნეგატივს ოპონენტებს აბრალებენ.

ამავე თემაზე: