იურიდიულ საკითხთა კომიტეტმა უზენაესი სასამართლოს მოსამართლეობის კანდიდატების, ასევე, კონსტიტუციისა და სხვა შესაბამისობის დადგენის ხელშესაწყობად კომიტეტის სამუშაო ჯგუფი შექმნა. დღეს, 11 სექტემბრის სხდომაზე ანრი ოხანაშვილმა განაცხადა, რომ "ობიექტური მიზეზების გამო", სახალხო დამცველი პროცესში მონაწილეობას ვერ მიიღებს. პროცესში არ ჩართეს არც არასამთავრობო ორგანიზაციები, რომლებიც სასამართლოს მანკიერ მხარეზე წლებია საუბრობენ.

სამუშაო ჯგუფი 10 დღე იმუშავებს და 23 სექტემბერს დაიწყება თითოეული კანდიდატის ინდივიდუალური მოსმენა. ანრი ოხანაშვილის განცხადებით, სამუშაო ჯგუფში ქართულ ოცნება წარმოდგენილი იქნება შვიდი წევრით (ანრი ოხანაშვილი, ზაზა გაბუნია, რატი იონათამიშვილი, გურამ მაჭარაშვილი, აკაკი ზოიძე, სოფო ქაცარავა და ნინო გოგუაძე), ევროპული საქართველო სამი წევრით, ნაციონალური მოძრაობა და პატრიოტთა ალიანსი კი ჯგუფში თითო წევრით იქნებიან წარმოდგენილი.

ევროპულმა საქართველომ სამუშაო ჯგუფში მონაწილეობაზე უარი განაცხადა, რადგან მათი თქმით, ჯგუფში არ იქნება წარმოდგენილი არასამთავრობო სექტორი.

ოთარ კახიძის განცხადებით, იმ შემთხვევაში თუკი უზრუნველყოფილი იქნება სამუშაო ჯგუფში არასამთავრობო სექტორის ჩართულობა, ევროპული საქართველო მიიღებს სამუშაო ჯგუფის მუშაობაში მონაწილეობას.

ანრი ოხანაშვილის თქმით, განხილვის დროს არასამთავრობო ორგანიზაციების კოალიციის წარმომადგენლებს მიეცემათ საშუალება დასვან მათთვის სასურველი შეკითხვები.

მისივე თქმით, კომუნიკაცია შედგა რამდენიმე დამოუკიდებელ დეპუტატთან და მათი კანდიდატურა ჯგუფს უახლოეს პერიოდში წარედგინება. ჯგუფის შემადგენლობაში ჩართული იქნებიან აკადემიური სფეროს წარმომადგენლები: თბილისის სახელმწიფო უნივერსიტეტის იურიდიული ფაკულტეტის დეკანი, პროფესორი თამარ ზარანდია და საქართველოს მეცნიერებათა აკადემიის წევრი, აკადემიკოსი ჯონი ხეცურიანი.

იუსტიციის უმაღლესმა საბჭომ პარლამენტისთვის წარსადგენი უზენაესის მოსამართლეობის კანდიდატთა სია 4 სექტემბერს დაამტკიცა. ამ სიაში 5 ის მოსამართლეა, რომელიც პარლამენტში აქამდე წარდგენილ 10-კაციან სიაში იყო: გიორგი მიქაუტაძე; ნინო ქადაგიძე; პაატა სილაგაძე; მერაბ გაბინაშვილი; თამარ ალანია. წინა სია მმართველ პარტიაში დაპირისპირების საგანი გახდა, სწორედ ამ მიზეზით დატოვა ქართული ოცნება ლევან გოგიჩაიშვილმა.