ფრაქცია ქართული ოცნების თავმჯდომარემ, მამუკა მდინარაძემ ტელეკომპანია იმედის გადაცემაში პირისპირ ქვეყნის წინაშე მდგარ გამოწვევებს შორის მთავარ გამოწვევად ტყუილთან დაპირისპირება დაასახელა. მისი თქმით, ეს არის ინოვაცია ქართულ პოლიტიკაში. მან საკუთარი მოსაზრების გასამყარებლად რამდენიმე მაგალითიც კი გაიხსენა, მათ შორის, ბიძინა ივანიშვილის დავა შვეიცარიულ ფინანსურ კომპანიასთან.

"საუბარი იყო ძალიან დიდ თანხაზე. საბოლოოდ, სასამართლომ დააკისრა აღნიშნულ კომპანიას 150 მლნ ფრანკის გადახდა. ერთ -ერთი პირი დააკავეს დანაშაულებრივ ქმედებისთვის. ამ დროს კი ნაციონალური მოძრაობის მიერ მართულ მედიასაშუალებაში დაიწერა სტატია, რომლითაც ლამის დააჯერეს საზოგადოება და გააჩინეს მოლოდინები იმისა, რომ დღე-დღეზე ბიძინა ივანიშვილს პასუხისგებაში მისცემდნენ. სტატიაში საუბარი იყო, რომ თითქოს ბიძინა ივანიშვილი ახორციელებდა ზეწოლას კომპანიაზე. და რა იყო ზეწოლის ხერხი? ის, რომ დაზარალებულმა ადამიანმა სარჩელი შეიტანა და ის, რომ საკუთარ ფულს ითხოვდა. მსგავსი მაგალითები მოდელირებულ ქრონიკაზე უარესი ვერსიაა", — განაცხადა მამუკა მდინარაძემ.

მან გერმანულ საერთაშორისო საზოგადოებრივ მაუწყებელში, "დოიჩე ველეში" გამოქვეყნებული სტატიაც გაიხსენა. "ყველა ტყუილს უნდა დაერქვას თავისი სახელი", — აღნიშნა ფრაქცია ქართული ოცნების თავმჯდომარემ.

"საქართველოს პარლამენტმა პრემიერად "მოსკოვის კაცს" დაუჭირა მხარი" — ამ სათაურით გერმანული გამოცემა Deutsche Welle აქვეყნებს სტატიას. ტექსტის დასაწყისშივე ნათქვამია, რომ გიორგი გახარია ყველაზე მეტად ანტისამთავრობო საპროტესტო აქციების ძალადობრივი დაშლითაა ცნობილი, როგორც ამ ყველაფრის "მთავარი არქიტექტორი". სტატიაში გიორგი გახარია მოხსენიებულია, როგორც "სადავო ფიგურა", რომელიც ქვეყნის პრემიერ-მინისტრად დაამტკიცეს, ამან კი კიდევ უფრო გააღვივა საპროტესტო ტალღა თბილისში.