"საქართველოს პარლამენტმა პრემიერად "მოსკოვის კაცს" დაუჭირა მხარი" — ამ სათაურით გერმანული გამოცემა Deutsche Welle აქვეყნებს სტატიას. ტექსტის დასაწყისშივე ნათქვამია, რომ გიორგი გახარია ყველაზე მეტად ანტისამთავრობო საპროტესტო აქციების ძალადობრივი დაშლითაა ცნობილი, როგორც ამ ყველაფრის "მთავარი არქიტექტორი". სტატიაში გიორგი გახარია მოხსენიებულია, როგორც "სადავო ფიგურა", რომელიც ქვეყნის პრემიერ-მინისტრად დაამტკიცეს, ამან კი კიდევ უფრო გააღვივა საპროტესტო ტალღა თბილისში.

"გახარიამ ეცადა ბრალდებების უარყოფას, რომ იგი "მოსკოვის კაცია" და სიტყვით გამოსვლისას საქართველოს ოკუპირებულ ტერიტორიებზე გაამახვილა ყურადღება", — წერს გამოცემა.

Deutsche Welle, ასევე, ციტირებს ნაციონალური მოძრაობის დეპუტატის, ნიკა მელიას ფრაზას: "გახარია იქნება ივანიშვილის უკანასკნელი დამქაში პრემიერ მინისტრის რანგში. ივანიშვილის ოლიგარქიული მმართველობა შეუთავსებელია დემოკრატიასთან. მომავალ წელს საქართველოს პრო-დასავლური პარტიები გაერთიანდებიან მის დასამარცხებლად".

Deutsche Welle გერმანულენოვანი სამაუწყებლო კომპანიაა. მათ ეკუთვნით DW-რადიო, DW-TV (ტელევიზია), ინტერნეტგამოცემა ოცდაათ ენაზე (DW.de) და ასევე DW-აკადემია. DW გერმანიის სამაუწყებლო კომპანიების გაერთიანების, ARD-ს წევრია.