საპარლამენტო უმრავლესობის ლიდერი, გია ვოლსკი საპარლამენტო ოპოზიციას აკრიტიკებს და ამბობს, რომ მათ მმართველი გუნდის კრიტიკისას არგუმენტები არ აქვთ. ის ირწმუნება, რომ მოსახლეობაში პოზიტიური ტენდენციებია.

"გეგმა, სტრატეგია, ხედვები საკმაოდ ჯანსაღია. მოსახლეობასთან შეხვედრები გვიჩვენებს, რომ ძალიან ბევრი პოზიტივია დაგროვილი, განწყობებია ამაღლებული, თუმცა ისეთი საკითხები, როგორიცაა ლარის კურსი, როგორიცაა გათვიცნობიერება იმ პოზიტივებსა და სახელმწიფო პროგრამებში არის ძალიან დაბალი", — განაცხადა გია ვოლსკიმ.

მისივე თქმით, ნაციონალური მოძრაობის დასრულების ორი გზა არსებობს, ერთი ოპოზიციის ხედვა, როცა "ყველას ციხეში კლავდნენ და აწამებდნენ" და მეორე ქართული ოცნების გზა "პოზიტიური საქმიანობა.

"სწორედ, მეორე არის ჩვენი სტრატეგია და ხედვა, სითბო, სათნოება, თუნდაც მწვავე, მაგრამ კონსტრუქციული დაპირისპირება, ეს იქნება ჩვენი სტილი დამამთავრებელ წელს", — განაცხადა გია ვოლსკიმ.

საქართველოს პარლამენტში დღეს მთავრობისთვის ნდობის გამოცხადების პროცედურა სრულდება. სწორედ, დღეს უნდა უყარონ კენჭი გახარიას ახალ მთავრობას ძველი სახეებით. სასესიო განხილვას არ ესწრება ევროპული საქართველო, ნაციონალური მოძრაობა კი სხდომაზე კითხვების დასმას გეგმავს. სხდომა პროტესტის ფონზე მიმდინარეობს. აქციას #სირცხვილიას აქტივისტები და ნაციონალური მოძრაობა მართავს.