პატრიოტთა ალიანსი მხარს არ უჭერს გიორგი გახარიას მთავრობას. ამის შესახებ პარტიის გენერალურმა მდივანმა, ირმა ინაშვილმა ფრაქციის სხდომაზე მინისტრთა კანდიდატების მოსმენის შემდეგ დასკვნით სიტყვაში განაცხადა.

"ჩვენ არ გიჭერთ მხარს იმიტომ, რომ თქვენ განზრახ, ქართველი ხალხის ნების წინააღმდეგ, არ დასაჯეთ და არ სჯით სააკაშვილ-ბოკერიებს. მეტიც, ეწევით მათთან პოლიტიკურ თამაშებს, პოლიტიკურ სპექტაკლებს და სწირავთ ქვეყანას", — განაცხადა ირმა ინაშვილმა.

მისი თქმით, პოლიტიკური თამაშის შედეგია არჩევნებზე დაფიქსირებული ხმების ის რაოდენობა, რომელიც ნაციონალურმა მოძრაობამ მიიღო.

"800 ათასი ხმა, ვირტუალური, რომელიც თქვენ დაუწერეთ ნაციონალურ მოძრაობას. 800 ათასი მხარდამჭერი რომ ჰყავდეთ, კიდევ კარგი არ ჰყავთ, 8 ათასი ადამიანი მაინც უნდა ჰყავდეთ პარლამენტის წინ. ხალხის მხარდაჭერა არ აქვთ", — თქვა ინაშვილმა და გააგრძელა მიზეზების ჩამოთვლა.

დღეს, 7 სექტემბერს პარლამენტში მინისტრთა მომავალ შემადგენლობას უსმენენ. პატრიოტთა ალიანსის ფრაქციის სხდომის დასრულების შემდეგ გახარიას მთავრობას ქართული ოცნების ფრაქციის სხდომაზე მოუწევს წარდგენა, ხვალ კი პლენარული სხდომაა ჩანიშნული.