"მე მინდა გთხოვოთ, რომ დაოკდეთ" — ასე მიმართა აჭარის მთავრობის თავმჯდომარე თორნიკე რიჟვაძემ აჭარის ტელევიზიის საინფორმაციო გამოშვების წამყვანს, თეონა ბაკურიძეს. რიჟვაძის ეს რეპლიკა მოყვა წამყვანის საუბარს იმაზე, რომ ქართული ოცნების პრემიერების ცვლილებისას, უმეტეს შემთხვევაში იცვლებოდნენ აჭარის თავმჯდომარეებიც.

"ბოლო დღეებში, თქვენგან განსაკუთრებით წამოიჭრა ეს საკითხი და მე მინდა გთხოვოთ, რომ დაოკდეთ. ვინაიდან, ჩვენ ვაგრძელებთ ჩვენი საქმის კეთებას წლის ბოლომდე", — განაცხადა რიჟვაძემ აჭარის ტელევიზიის პირდაპირ ეთერში.

ჟურნალისტის კითხვაზე, ვის "დაოკებას" ითხოვდა ის, ტელევიზიის თუ წამყვანის, რიჟვაძემ არ უპასუხა. ჟურნალისტის შენიშვნაზე, რომ მსგავსი შეფასება არასწორია, რიჟვაძემ განაცხადა:

"ეს თქვენი გადაწყვეტილებაა რას დაეთანხმებით და რა არ მოგეწონებათ".

აჭარის ტელევიზია პრემიერის ცვლილების შემდეგ ამზადებდა სიუჟეტებს იამზე, რომ წინა შემთხვევებში, როცა პრემიერი პოსტს ტოვებდა იცვლებოდნენ აჭარის მთავრობის მეთაურებიც. სავარაუდოდ, ეს იგულისხმა რიჟვაძემ ფრაზაში "თქვენგან განსაკუთრებით წამოიჭრა ეს საკითხი".