პრემიერმინისტრობის კანდიდატმა გიორგი გახარიამ განაცხადა, რომ სპეციალური აღჭურვილობის გამოყენების გარკვეულ პროცედურებს შეცვლიდა, მაგრამ ამავე დროს აცხადებს, რომ რეზინის ტყვიებს ყოველთვის გამოიყენებს, თუ სახელმწიფო ინსტიტუტები და მოქალაქის ჯანმრთელობა იქნება დასაცავი.

"დღევანდელი გადმოსახედიდან ერთმნიშვნელოვნად შემიძლია ვთქვა, რომ გარკვეულ პროცედურებს შევცვლიდი. არის გარკვეული ინსტრუქციები სხვადასხვა სახის სპეციალური აღჭურვილობის გამოყენებაზე, მაგრამ სრულად ვერ ამოვიღებდით [რეზინის ტყვიებს]", — განაცხადა გიორგი გახარიამ.

ევროპული საქართველოს დეპუტატის, ირმა ნადირაშვილის კითხვაზე, გამოიყენებს თუ არა ის რეზინის ტყვიებს სხვა შემთხვევაში, გიორგი გახარია პასუხობს: "ამ ტყვიებს ყოველთვის გამოვიყენებთ მაშინ, როცა სახელმწიფო ინსტიტუტები, მოქალაქის ჯანმრთელობა შტურმისგან, თავდასხმისგან იქნება დასაცავი".

მისივე თქმით, არ ყოფილა გაცემა ბრძანება, რომ ადამიანებისთვის თავში დაემიზნებინათ. დამაზუსტებელ კითხვებზე, თვითნებობდნენ თუ არა სამართალდამცავები, გახარია პასუხობს, რომ ევროპული საქართველოს დეპუტატები ტყუიან.

"ინსტრუქცია რომ წაიკითხოთ შემდგომ, იმ ტყვიების დამიზნებით სროლა შეუძლებელია. ამ ტყვიის დამიზნებით სროლა შეუძლებელია, ინსტრუქციაში წერია. ახლო მანძილიდან სროლა არის პრობლემა და შესაბამისი ინსტრუქციის დარღვევა. მის ინტრუქციაში წერია, რომ ეს ტყვია არის ეფექტური 10-15 მეტრამდე. შსს-ში არის ბრძანება, რომელიც მიუთითებს, რომ ეს ტყვიები შეიძლება გამოყენებული იყოს მხოლოდ 20 მეტრიდან. გადაცდომები იყო, რის გამოც გენერალურ პროკურატურას სამ საქმეზე აქვს გამოძიება დაწყებული", — განაცხადა გიორგი გახარიამ.

გახარიას მთავრობას საქართველოს პარლამენტში ევროპული საქართველოს ფრაქციის ფორმატში უსმენენ. პარტია კითხვებს მხოლოდ 20-21 ივნისის აქციაზე სვამს. დღის პირველ ნაწილში გიორგი გახარიას ნაციონალური მოძრაობის ფრაქციაზე უსმენდნენ, სადაც მას სიმღერა "გახარიას უხარია" ჩაურთეს, შემდგომ დასმულ კითხვებზე მინისტრის პასუხებს არ მოუსმინეს და სხდომა დაასრულეს.

ამავე თემაზე: