ქართული ოცნების ყოფილი წევრისა და დამოუკიდებელი დეპუტატის, ეკა ბესელიას თქმით, მთავრობის დამტკიცებაზე უფრო მნიშვნელოვანი უზენაესი სასამართლოს მოსამართლეობის კანდიდატების სიაა. ამის შესახებ დეპუტატმა აჭარის ტელევიზიასთან ისაუბრა.

"მთავრობა შეიცვლება ერთ წელიწადში, 2020 წლის არჩევნებით ჩვენ სხვა მთავრობა გვეყოლება, მაგრამ ეს მოსამართლეები უნდა გამწესდნენ უვადოდ და ვერ შეიცვლება. ეს გადაწყვეტილება ისტორიაში შევა, ისტორიული მეხსიერება შეინახავს იმ დეპუტატების გვარს, ვინ მისცა ხმა წარსულსა და ქვეყნის ბოროტებაში დაბრუნებას", — აღნიშნა ბესელიამ.

მისივე თქმით, ის, რომ ძველი სიიდან ხუთი კანდიდატი იუსტიციის საბჭოს ახალ სიაშიც მოხვდა, ე.წ. მურუსიძე-ჩინძალაძის კლანის ლობირებაზე მეტყველებს.

იუსტიციის უმაღლესმა საბჭომ პარლამენტისთვის წარსადგენი უზენაესის მოსამართლეობის კანდიდატთა სია დაამტკიცა. სიაში არიან:

  • თამარ ალანია;
  • მერაბ გაბინაშვილი;
  • შოთა გეწაძე;
  • მირანდა ერემაძე;
  • მამუკა ვასაძე;
  • მაია ვაჩაძე;
  • თამარ ზამბახიძე;
  • შალვა თადუმაძე;
  • ზაზა თავაძე;
  • ვლადიმერ კაკაბაძე;
  • ლევან მიქაბერიძე;
  • გიორგი მიქაუტაძე;
  • პაატა სილაგაძე;
  • ნუგზარ სხირტლაძე;
  • ლალი ფაფიაშვილი;
  • ნინო ქადაგიძე;
  • ლაშა ქოჩიაშვილი;
  • ქეთევან ცინცაძე;
  • ალექსანდრე წულაძე;
  • გოჩა ჯეირანაშვილი.

ჩამონათვალში მოხვდნენ ის კანდიდატებიც, რომლებიც დასამტკიცებლად პარლამენტს საბჭომ ერთხელ უკვე გადაუგზავნა და რასაც პროტესტი მოყვა როგორც სამოქალაქო, ასევე პოლიტიკურ წრეებში.

პარლამენტში წარსადგენ კანდიდატებს შორის ძველი სიიდან არიან: გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი და თამარ ალანია.

დიმიტრი გვრიტიშვილმა, რომელიც იუსტიციის უმაღლესი საბჭოს მდივნის ფუნქციას ითავსებდა, განაცხადა, რომ სიას პარლამენტს უახლოეს დღეებში გადაუგზავნიან. პარლამენტმა სია ჯერ კომიტეტებში, შემდეგ კი პლენარულ სხდომაზე უნდა განიხილოს და გადაწყვიტოს დაამტკიცებს თუ არა ამ მოსამართლეებს უვადოდ.