პოპულარული მომღერალი არიანა გრანდე სწრაფი მოდის დისტრიბუტორ კომპანიას, Forever 21 მისი იმიჯის უნებართვოდ გამოყენებისთვის უჩივის.

როიტერსის ინფორმაციით, 26 წლის მომღერალი ლოს-ანჯელესის სასამართლოში შეტანილ საჩივარში უთითებს, რომ ბრენდმა გრანდეს სტილში წარმოდგენილი 30-ზე მეტი მოდელის სურათი და ვიდეო გამოიყენა პროდუქციის გასაყიდად. სარეკლამო პოსტებში ასევე გამოყენებულია არიანას სახელი და მუსიკა.

მომღერალი ამბობს, რომ ერთ-ერთი მოდელი მასზე მიმსგავსებულია, Forever 21-ის რეკლამებში კი ასევე გამოყენებულია ტექსტი მისი სიმღერიდან, 7 Rings.

ფოტო: სქრინი სარჩელიდან / Reuters

საავტორო უფლებების დარღვევისთვის, ყალბი რეკლამირებისთვის და იმიჯის დაზიანებისთვის მომღერალი 10 მილიონ დოლარს ითხოვს.

არიანა გრანდეს ინსტაგრამზე — 163, ხოლო ტვიტერზე 65,4 მილიონი გამომწერი ჰყავს. მისი ფანების უმრავლესობა მოდის ბრენდის სამიზნე აუდიტორიას წარმოადგენენ.

ფოტო: სქრინი სარჩელიდან / Reuters

Forever 21-ის წარმომადგენელმა ბრალდებები უარყო:

"ჩვენ არიანა გრანდეს მხარდამჭერები ვართ და მის სალიცენზიო კომპანიასთან ბოლო ორი წელია ვთანამშრომლობთ, თუმცა ბრალდებებს უარვყოფთ და იმედს ვიქონიებთ, რომ ორმხრივ შეთანხმებას მივაღწევთ და მომავალში ერთად მუშაობას გავაგრძელებთ".

ფოტო: სქრინი სარჩელიდან / Reuters