თბილისის საქალაქო სასამართლომ კრიმინალური პოლიციის დეპარტამენტის ყოფილი დირექტორის, ერეკლე კოდუას დედის, ბიზნესმენ ლაურა ღაჭავას აღკვეთის ღონისძიების სახით ნახევარი მილიონი ლარის გირაო შეეფარდა. გარდა ამისა, ღაჭავას საგამოძიებო ორგანოს ინფორმირებისა და თანხმობის გარეშე სახელმწიფო საზღვრის გადაკვეთა აეკრძალა.

ლაურა ღაჭავას მიმართ სისხლის სამართლებრივი დევნა დაიწყო. ფინანსთა სამინისტროს საგამოძიებო სამსახურში გუშინ, 21 აგვისტოს განაცხადეს, რომ ღაჭავას ბრალად ედება საგადასახადო დოკუმენტების გაყალბების გზით, დამატებითი ღირებულების გადასახადში ყალბი აქტივების შექმნა და ამ გზით სახელმწიფოსთვის 2 160 955 ლარის ზიანის მიყენება.

უწყებაში აღნიშნეს, რომ ბრალდებულმა, ლაურა ღაჭავამ უკანონო მატერიალური სარგებლის მიღების მიზნით სხვა პირებთან ერთად, საგადასახადო დეკლარაციებში ყალბი მონაცემები შეიტანა და ყალბი დოკუმენტები გააფორმა. მათივე თქმით, საშემოსავლოსა და სოციალური გადასახადის დეკლარაციების დაზუსტებისა და არარსებული ოპერაციებით მანიპულაციით ღაჭავამ თავის კომპანიას შეუქმნა რამდენიმე მილიონიანი ყალბი აქტივი დამატებული ღირებულების გადასახადში, რომლითაც შემდგომში იფარებოდა კომპანიების მიმდინარე საგადასახადო ვალდებულებები და ნავთობპროდუქტების იმპორტთან დაკავშირებული საბაჟო მოსაკრებლები.