მმართველი პარტიის დეპუტატი გია ვოლსკი აცხადებს, რომ რუსთავი 2-დან წამყვანი სახეებისა და საინფორმაციო სამსახურის ხელმძღვანელის გათავისუფლება არაფერ შუაშია არხის კრიტიკულობასთან. მისი თქმით, თანამშრომლებს, რომლებიც კომპანიის დანგრევას ისახავენ მიზნად ნებისმიერი სხვა კომპანიაც გაათავისუფლებდა.

"კონკრეტულმა ადამიანებმა გამოაცხადეს, მათ შორის ყოფილმა გენერალურმა დირექტორმა, რომ იბრძოლებენ და მათი მთავარი მიზანი იქნება რუსთავი 2-ის დანგრევა. არც ტელეკომპანია, არც ნებისმიერი სხვა დაწესებულება არ დაუშვებს იმას, რომ საკუთარი თანამშრომლები, მითუმეტეს საკვანძო პოსტებზე მყოფი თანამშრომლები ღიად აცხადებდნენ, რომ ამ კომპანიის დანგრევაში მიიღებენ მონაწილეობას", — განმარტა მან.

დეპუტატმა აღნიშნა ისიც, რომ რუსთვი 2 კრიტიკულ ტელევიზიად არ მიაჩნია და სინამდვილეში ის "პარტიული ტელევიზიაა".

გუშინ, 20 აგვისტოს ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს გიორგი ლაფერაშვილს; პოლიტიკური გადაცემების წამყვანებს გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

პროტესტის ნიშნად არხიდან წავიდნენ დღის მთავარი საინფორმაციო გამოშვების წამყვანები. არხზე ამ დრომდე არ გასულა საინფორმაციო გამოშვება და ვებგვერდზე არ იდება ნიუსებიც.