რუსთავი 2-ის ყოფილი ტელეწამყვანის, ეკა კვესიტაძის თქმით, დღეს რუსთავი 2-ში დარჩენა ნიშნავს იმ ხელისუფლებასთან თანამშრომლობას, რომელიც "ამ ქვეყანას ღუპავს". #სირცხვილიას გადაცემაში საუბრისას კვესიტაძემ აღნიშნა, რომ არხის ყოფილმა გენერალურმა დირექტორმა, ნიკა გვარამიამ წამოსულ თანამშრომლებს მთავარ არხზე მუშაობა შესთავაზა.

"მიზეზი, რომ ოჯახი მყავს, რომელიც ლეგიტიმურია და ყველას უკან ოჯახები გვყავს, ამ შემთხვევაში თავის ლეგიტიმურობას კარგავს, რადგან მათ აქვთ შეთავაზება. ვერც წარმატებას ვუსურვებ იმ ადამიანებს, ვინც არხზე დაჩება და პირდაპირ ვიტყვი, რომ ეს იქნება მათი მხრიდან სამარცხვინო საქციელი", — აღნიშნა კვესიტაძემ.

ტელეწამყვანმა ნანუკა ჟორჟოლიანმა უკვე დაადასტურა, რომ მუშაობას ნიკა გვარამიას მთავარ არხზე გააგრძელებს.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

ამასთანავე, რუსთავი 2 დატოვეს ცხრასაათიანი კურიერის წამყვანებმა დიანა ჯოჯუამ და მიშა სესიაშვილმა.