დღეს, 16 აგვისტოს სოფელ გუგუტიანთკარში, სადაც ე.წ. საზღვრის უკანონო გავლება განაახლეს, აშშ-ს პრესის და ინფორმაციის ატაშე კრის დევენპორტი ჩავიდა. ამის შესახებ აშშ-ს საელჩო ავრცელებს განცხადებას. მისი თქმით, აშშ გუგუტიანთკარის ხალხის გვერდითაა და "შტატები არასოდეს შეეგუება რუსეთის მიერ საქართველოს სუვერენული ტერიტორიის ოკუპაციას".

"დღეს განსაკუთრებით გულსატკენი იყო იმის ხილვა, როგორ ითვისებენ რუსეთის საოკუპაციო ძალები ამ ხალხის მიწებსა და სახლს, მათ ხომ მხოლოდ საკუთარ ქვეყანაში მშვიდობიანი ცხოვრება სურთ. ამ ადამიანებს ართმევენ მთელი ცხოვრების მონაგარს და საზოგადოებას ორად ყოფენ. ამის ფონზე განსაკუთრებით ამაღელვებელი იყო გუგუტიანთკარელების მტკიცე გზავნილების მოსმენა ერთობასა და საქართველოს კეთილდღეობაზე", — თქვა აშშ-ის პრესის და ინფორმაციის ატაშემ, კრის დევენპორტმა.

საოკუპაციო ხაზთან, იქ სადაც რუსმა სამხედროებმა მოსახლეობის სახლები და საკარმიდამო ნაკვეთები შემოღობეს, ელჩები დღეს, 16 აგვისტოს 12 საათისთის ჩავიდნენ. მათ შორის იყო იაპონიის ელჩი, ტადაჰარუ უეჰარა, რომელმაც აღნიშნა, რომ შეშფოთებულია ადგილზე ნანახი ვითარებით.

15 აგვისტოს გორის მუნიციპალიტეტის სოფელ გუგუტიანთკარში საოკუპაციო რეჟიმმა ე.წ. საზღვრის გავლების უკანონო პროცესი განაახლა. საქართველოს მოქალაქეების, რაზმაძეებისა და გუგუტიშვილების ნაკვეთებში რუსი სამხედროები ძელებს არჭობდნენ. ეს ოჯახები სწორედ ამ მიწის ნაკვეთებს ამუშავებდნენ და მოსავალი მოჰყავდათ. შესაძლოა, ოკუპირებულ ტერიტორიაზე მოხვდეს სოფლის მთავარი სარწყავი არხიც. შედეგად, ადგილობრივები წყლის გარეშე დარჩებიან. გორის საკრებულოს წარმომადგენელმა თქვა, რომ ამ საკითხზე რუს სამხედროებს ესაუბრა, რომლებმაც უთხრეს, რომ წყლის რეზერვუარს საქართველოს არაკონტროლირებად ტერიტორიაზე არ მოაქცევდნენ.

სახელმწიფო უსაფრთხოების სამსახურში On.ge-ს უთხრეს, რომ ორჯერ გაააქტიურეს ცხელი ხაზი, ინფორმირებულია ევროკავშირის სადამკვირვებლო მისია. ამავე სოფელში მავთულხლართების გაბმა დაიწყეს 7 აგვისტოსაც, მოგვიანებით კი სამუშაოები შეწყდა, ოთხი დღის შემდეგ კი ისევ განახლდა.