თბილისის სააპელაციო სასამართლომ ნიკა გვარამიას ადვოკატის, დიმიტრი საძაგლიშვილის საჩივარი დაუშვებლად სცნო. სასამართლოს ცნობით, გასაჩივრებისთვის კანონით დადგენილი 48 საათიანი ვადა დარღვეული იყო.

სააპელაციო სასამართლოს განცხადებაში წერია, განჩინება თბილისის საქალაქო სასამართლომ 2019 წლის 11 აგვისტოს ღამის 01:30 საათზე გამოიტანა და გასაჩივრების 48 საათიანი ვადა 13 აგვისტოს 01:30 საათზე ამოიწურა. ნიკა გვარამიას ადვოკატმა, დიმიტრი საძაგლიშვიმა საჩივარი 13 აგვისტოს 17:39 საათზე, 16 საათის დაგვიანებით შეიტანა.

დიმიტრი საძაგლიშვილის განმარტებით, სააპელაციო სასამართლომ დრო არასწორად დათვალა, რადგან სასამართლოს გადაწყვეტილება მას 12 აგვისტოს საღამოს გადასცეს.

"ბუნებრივია, არ გვქონდა იმის ილუზია, რომ სააპელაციო სასამართლო, რომლის თავმჯდომარეც არის მიხელ ჩინჩალაძე დააკმაყოფილებდა ჩვენს საჩივარს. ასე რომ, არაფერი მოულოდნელი არ ყოფილა ჩვენთვის, უბრალოდ, ფორმალურად მაინც გამოვიყენეთ დაცვის მექანიზმი, რომელიც აუცილებლად უნდა გამოგვეყენებინა", — აღნიშნა On.ge-სთან საუბრისას საძაგლიშვილმა.

11 აგვისტოს რუსთავი 2-ის ყოფილ დირექტორს სასამართლომ აღკვეთის ღონისძიებად 40 ათასი ლარის ოდენობით გირაო შეუფარდა და პროკურატურის ნებართვის გარეშე ქვეყნის დატოვება აუკრძალა. ნიკა გვარამიამ ბრალის წაყენების დროსაც და სასამართლო სხდომაზეც განაცხადა, რომ ის არ დაემორჩილებოდა აღკვეთის ღონისძიების არც ერთ სახეს და მისი დაპატიმრება მოუწევდათ. გვარამიას წინააღმდეგ 16 ივლისს რუსთავი 2-ის 9-პროცენტიანი წილის ყოფილმა მფლობელმა, ნინო ნიჟარაძემ პროკურატურაში საჩივარი შეიტანა. ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვდა. ის აცხადებდა, რომ გვარამიას გადაწყვეტილებებმა არხს ფინანსური ზიანი მიაყენა.