ტელეკომპანია რუსთავი 2-ის დირექტორი და არხის მფლობელის ადვოკატი, პაატა სალია ამბობს, რომ არ იცის, სურს თუ არა ბიძინა ივანიშვილს ტელევიზიის ყიდვა. ამ საკითხზე სალიამ On.ge-ს ჟურნალისტის კითხვაზე პასუხის გაცემის დროს ისაუბრა.

ჟურნალისტი დაინტერესდა, სურვილის არსებობის შემთხვევაში ქიბარ ხალვაში მიყიდდა თუ არა ტელევიზიას ბიძინა ივანიშვილს.

"ბიძინა ივანიშვილის მხრიდან დაინტერესებაზე ჩემთვის უცნობია, ქიბარ ხალვაშმა ერთი პირი [მიხეილ სააკაშვილი] დაასახელა [ვისაც არ მიყიდდა], შესაბამისად, ნებისმიერი სხვა შეიძლება განიხილებოდეს... მე არ ვიცი რამდენად აქვს ბიძინა ივანიშვილს ინტერესი რუსთავი 2-ის შეძენასთან დაკავშირებით", — განმარტა სალიამ.

დღეს, 12 აგვისტოს არხის მფლობელმა, ქიბარ ხალვაშმა არხის გაყიდვასთან დაკავშირებით განცხადება გაავრცელა. ხალვაში აცხადებს, რომ არხს მიყიდის ყველას, საქართველოს ყოფილი პრეზიდენტის, მიხეილ სააკაშვილის გარდა.