ყოფილმა პრეზიდენტმა მიხეილ სააკაშვილმა, თბილისში ვარდების მოედანზე, აქციაზე შეკრებილებს მიმართა.

ვიდეო მიმართვაში სააკაშვილმა საქართველოს ყველა რეგიონი გაიხსენა და ხალხს მათ განვითარებას დაპირდა. მისი თქმით, იგი მზადაა ახალი მთავრობის ჩამოყალიბებაში აქტიური მონაწილეობა მიიღოს:

"3 დღეში დგება სიმართლის ჟამი. 3 დღეში დასრულდება ერთი ახირებული რუსი ოლიგარქის ექსპერიმენტი. ზუსტად 3 დღეში დასრულდება დიდი ქოციანობა. ზუსტად 3 დღეში აღარ ექნება მნიშვნელობა ვინ როგორ მისცა ხმა 2012 წელს, ზუსტად 3 დღეა დარჩენილი ჩემთვის ამ ზღვის გადმოლახვამდე, ხოლო ჩვენთვის ეს არის 3 დღე გამარჯვებამდე.

ხალხი დაიღალა დაპაუზებით და ჩვენ ვხედავთ, რომ ხალხს მოენატრა დრაივი, ტემპი. ჩვენ დავრწმუნდით, რომ ჩვენს ხალხს აღარ უნდა მუდმივად წარსულში ქექვა, მუდმივი დაჭერები, როდესაც ყველა შემდეგი მთავრობა იჭერს წინას. ხალხს უნდა წინსვლა და ესეც ჩვენი გამარჯვების საწინდარია. მინდა ვუთხრა პოლიციელებს რომ ჩვენ ვამაყობთ თქვენით".

ნაციონალური მოძრაობის აქცია ვარდების მოედანზე მიმდინარეობს. საპროტესტო აქციაზე დასასწრებად მოქალაქეები სხვადასხვა რაიონიდან ჩამოვიდნენ და ამბობენ, რომ აქციაში უკეთესი მომავლისა და ცვლილებებისთვის იღებენ მონაწილეობას.