ბრალდებული, რომელიც 24 წლის რუსი ინსტაგრამ ინფლუენსერისა და დერმატოლოგის მკვლელობას აღიარებს, ასევე ამბობს, რომ მოკლულის ყოფილი შეყვარებულია.

მისი თქმით, მან ეკატერინა კარაგლანოვას კისერსა და გულში "მინიმუმ ხუთჯერ" მიაყენა ჭრილობები.

BBC-ის ინფორმაციით, ბრალდებულის აღიარების ვიდეო რუსეთის პოლიციამ გაავრცელა, რომელშიც ის ამბობს, რომ კარაგლანოვამ მასთან ურთიერთობა გაწყვიტა.

ეკატერინა კარაგლანოვა საკუთარ სახლში მოკლული მშობლებმა გასულ პარასკევს, 26 ივლისს იპოვეს. ის ცნობილი იყო მოდასთან და მოგზაურობასთან დაკავშირებული პოსტებით და ინსტაგრამზე 90 ათასზე მეტი გამომწერი ჰყავდა.

მას გამომწერები ხშირად ამსგავსებდნენ ოდრი ჰეპბერნს და თავად კარაგლანოვაც ხშირად პოსტავდა მსახიობის სურათებს. ერთ-ერთ პოსტზე ის წერდა, რომ მოგზაურობა უყვარდა, თუმცა ერთ ქვეყანაში ხუთ დღეზე მეტს არ ატარებდა. ეკატერინა მოსკოვის სამედიცინო სკოლაში დერმატოლოგის პროფესიას ეუფლებოდა.

კარაგლანოვა 30 ივლისს 25 წლის ხდებოდა და დაბადების დღის აღნიშვნას შეყვარებულთან ერთად ჰოლანდიაში გეგმავდა. მისი სხეული დერეფანში დატოვებულ ჩემოდანში იყო მოთავსებული.