პროკურატურის ინფორმაციით, ტელეკომპანია რუსთავი 2-ის კონტრაქტორი საწარმოებიდან გამოძიებისთვის საჭირო დოკუმენტაციასა და ელექტრონულ ინფორმაციას ამოიღებენ. პროკურატურის ცნობით, ამის შესახებ სასამართლოსგან შესაბამისი განჩინებები მიიღეს.

"რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის საქმეზე მიმდინარე გამოძიების ფარგლებში, პროკურატურის შუამდგომლობის საფუძველზე მიღებულია სასამართლოს შესაბამისი განჩინებები რუსთავის 2-ის კონტრაქტორი საწარმოებიდან, მათ შორის ინტერ მედია და ინტერ მედია პლიუსიდან, გამოძიებისათვის საჭირო დოკუმენტაციისა და ელექტრონული ინფორმაციის ამოღების თაობაზე", — ნათქვამია პროკურატურის განცხადებაში.

მათივე თქმით, სხვა საპროცესო და საგამოძიებო მოქმედებებთან ერთად, მიმდინარე გამოძიების ფარგლებში, დაგეგმილია ტელეკომპანიის ყოფილი დირექტორის, ნიკა გვარამიას გამოკითხვა.

რუსთავი 2-ის 9-პროცენტიანი წილის ყოფილი მფლობელის, ნინო ნიჟარაძის ადვოკატმა, გიორგი ყავლაშვილმა გენერალურ პროკურატურაში ნიკა გვარამიას წინააღმდეგ საჩივარი შეიტანა. ნინო ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვს.