გერმანულმა როკ-ჯგუფმა, Rammstein-მა მოსკოვში გამართულ კონცერტზე ლგბტ თემს მხარი კოცნით დაუჭირა. ამის შესახებ GayTime-ს წერს. ფოტოები Rammstein-ის ინსტაგრამგვერდზე გამოქვეყნდა, სადაც რუსულად წერია "რუსეთი, ჩვენ შენ გვიყვარხარ".

ერთმანეთს ჯგუფის ორმა წევრმა გიტარისტებმა პაულ ლანდერსმა და რიჩარდ კრუსპემ აკოცა. ამ დროს ჯგუფი სიმღერას Aüslander -ს ასრულებდა.

პირველი შემთხვევა არ არის, როცა ჯგუფი ლგბტ პირებს კონცერტების დროს საჯარო მხარდაჭერას უცხადებს. ჰოლანდიაში, ბენდის წევრები ლგბტ დროშას აქნევდნენ პერფორმანსის დროს.

რუსეთში ლგბტ თემის უფლებრივი მდგომარეობა მძიმეა. რუსეთში მოქმედებს არასრულწლოვანთა შორის "გეი პროპაგანდის" აკრძალვის შესახებ კანონი, რომლის საფუძველზეც ლგბტ თემის წევრები იდევნებიან. იანვარში ჩეჩნეთში ლგბტ თემის წევრების დევნისა და დაკავების ახალი ტალღა დაიწყო. ევროპის საბჭოს საპარლამენტო ასამბლეამ 2018 წლის ივნისში მიიღო რეზოლუცია, რომლითაც რუსეთს ლგბტ პირების დევნის საკითხის გამოძიებისკენ მოუწოდა ან ამის უფლება საერთაშორისო ორგანიზაციისთვის მიეცა. გარდა ამისა, ჩეჩნეთში ადამიანის უფლებების დარღვევის შესახებ ეუთომ დეკემბერში ანგარიში წარადგინა. დოკუმენტში ნათქვამია, რომ რესპუბლიკაში ლგბტ პირების დევნა აშკარაა.