შინაგან საქმეთა სამინისტროს ცნობით, ბათუმში, ლიფტის ჩაწყვეტის შემდეგ მომხდარ ინციდენტზე გამოძიება ჟურნალისტისათვის პროფესიულ საქმიანობაში უკანონოდ ხელის შეშლის მუხლით დაიწყო. შემთხვევა გათვალისწინებულია სისხლის სამართლის კოდექსის 154-ე მუხლით. შსს-ს განცხადებით, მიმდინარეობს საგამოძიებო მოქმედებები.

კანონით, ჟურნალისტურ საქმიანობაში ხელშეშლა ჩადენილი ძალადობის მუქარით ან სამსახურეობრივი მდგომარეობის გამოყენებით, ისჯება ჯარიმით ან თავისუფლების აღკვეთით ვადით ორ წლამდე.

დღეს, 29 ივლისს ბათუმში, მშენებარე კორპუსთან, სადაც ლიფტი ჩაწყდა და ოთხი ადამიანი დაშავდა, პირველი არხის ოპერატორს ქვა ესროლეს. ინციდენტი მაშინ მოხდა, როდესაც აჭარის ტელევიზია პირდაპირ ეთერში იყო და ლიფტის ჩავარდნის შემთხვევას აშუქებდა. კადრებში ისმის ჟურნალისტის ხმა, რომ შემოსაზღვრული ტერიტორიის მიღმა მყოფმა მოქალაქეებმა, სავარაუდოდ, სამშენებლო კომპანიის წარმომადგენლებმა, ქვების სროლა დაიწყეს და ჟურნალისტებსა და ოპერატორებს სიტყვიერი შეურაცხყოფა მიაყენეს.

ბათუმის სასწრაფო სამედიცინო სამსახურის პრესსამსახურში On.ge-ს უთხრეს, რომ ლიფტში ოთხი ადამიანი იყო, ერთი ქალი და სამი კაცი. მათგან ორს მოტეხილობა აქვს, ერთს კი მსუბუქი დაზიანება.