ომალოსკენ მიმავალი სატვირთოს ხევში გადავარდნის შედეგად ხუთი ადამიანი გარდაიცვალა, მათ შორის ერთი არასრულწლოვანია. ამ დრომდე ეძებენ ორ მგზავრს. ამის შესახებ ინფორმაციას საგანგებო სიტუაციების მართვის სამსახური ავრცელებს.

უწყების ინფორმაციითვე, გარდა ამისა, დაშავდა ხუთი ადამიანი, მათგან სამი კი საავადმყოფოში გადაიყვანეს.

"გამოძიების პირველადი ინფორმაციით, ომალოს მიმართულებით მოძრავი "კამაზის" მარკის სატვირთო ავტომანქანის მძღოლმა ვერ უზრუნველყო ავტომანქანის უსაფრთხო მართვა, გზიდან გადავიდა და ხევში გადავარდა. საქმესთან დაკავშირებით დაინიშნება შესაბამისი ექსპერტიზები", — განმარტავენ უწყებაში.

საქმეზე გამოძიება სისხლის სამართლის კოდექსის 276-ე მუხლის მე-5 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია.