ახალი არაფერია იმაში, რომ ცხოველების აქვთ განსაკუთრებული შესაძლებლობები, რომელთა საშუალებითაც ჩვენზე დადებითად ზემოქმედებენ და პოზიტიური ემოციებითაც გვავსებენ.

სწორედ ამ გამოცდილებაზე დაყრდნობით 2015 წელს აშშ-ში, ინდიანას შტატის ერთ-ერთ ციხეში ცხოველთა დაცვის ორგანიზაციამ არაჩვეულებრივი პროექტი წამოიწყო და ამავე დაწესებულების პატიმრებს, კატების მოვლის საშუალება მისცა.

იდეა საკმაოდ სასარგებლო მიზნებს ემსახურებოდა, რადგან ერთის მხრივ, ამით უპატრონო ცხოველების მოვლა და უსაფრთხოება იქნებოდა გარანტირებული, მეორე მხრივ კი პროგრამის ბენეფიციარებს სწრაფი რეაბილიტირების საშუალება მიეცემოდათ.

ფოტო:
Pendleton Correctional Facility_FORWARD / Facebook

კატების უმრავლესობას, რომლებიც საბოლოოდ თავშესაფარში ხვდებიან ხომ მათზე განხორციელებული ძალადობის სამწუხარო გამოცდილება აქვთ, რის გამოც, შემდგომში ადამიანებთან ურთიერთობა ძალიან უჭირთ.

პატიმრები ცხოველებს იქ ისე უვლიან, როგორც საკუთარ შინაურ ცხოველებს — კვებავენ, ბანენ და ეთამაშებიან კიდეც.

მხოლოდ კატები არ სარგებლობენ ამ პროგრამით. საქმე ის არის, რომ ცხოველების მიმართ გაჩენილი პასუხისმგებლობა მსჯავრდადებულებზე დადებითად აისახება, რაც მათ საბოლოო რეაბილიტირებას უწყობს ხელს. ისინი კარგად სწავლობენ, თუ როგორ უნდა იზრუნო, გიყვარდეს და აფასებდე.

"პატიმრები იხსენებენ, რომ, როდესაც ცხოველები მოვუყვანეთ, მათ პირველად მიეცათ შესაძლებლობა, რაღაცით დაინტერესებულიყვნენ და ჰყვარებოდათ", — ამბობს საპატიმროს დირექტორი.