თბილისის მერიის არქიტექტურის სამსახურმა ხინკლის ფორმის კაფის აშენებაზე არქიტექტორ კობა მოდრეკილაძეს უარი განუხილველად უთხრა. ამის შესახებ ინფორმაცია თავდაპირველად რადიო ფორტუნამ გაავრცელა.

განცხადება თბილისის მერიაში 14 მაისს შევიდა. ინვესტორი კვე ბის ობიექტის აშენებას თბილისის ზღვაზე გეგმავდა, შენობის სიმაღლე 10 მეტრზე იყო გათვლილი და ის 450 კვადრატულ მეტრზე უნდა განთავსებულიყო. უარის მიზეზი საპროექტო მიწის ნაკვეთის სტატუსი გახდა. თბილისის მერიაში On.ge-ს განუმარტეს, რომ ადგილი, სადაც ინვესტორს კვების ობიექტის განთავსება უნდოდა, არ ჯდება განაშენიანების რეგულირების გეგმის საზღვრებში.

"ამ ტერიტორიაზე პროექტით გათვალისწინებულია დაახლოებით 45 ერთეული საცხოვრებელი სახლი და ასევე შემდეგი ობიექტები, ღია ავტოსადგომი, საფეხმავლო ბილიკი, საბავშვო ბაღი, კომერციული დანიშნულების მცირე ობიექტები — პირველადი მოხმარების საქონლის მაღაზია, სურსათი, აფთიაქი", — ნათქვამია თბილისის მერიის პასუხში.