ერთიანი ნაციონალური მოძრაობის წარმომდგენელი, ელენე ხოშტარია გორის მაჟორიტარობის კანდიდატზე, ირაკლი ოქრუაშვილზე თავდასხმას ეხმაურება და მმართველ გუნდს ოპონენტების მიმართ ძალადობაში ადანაშაულებს:

"გუშინ ჩვენ ვნახეთ, რომ კანდიდატს პირდაპირ საარჩევნო შეხვედრაზე ცეცხლსასროლი იარაღით უსწორდებიან და სამწუხაროდ, არიან დაზარალებულები. ჩვენ ვხედავთ, რომ ნაცვლად იმისა, რომ ხელისუფლება იყოს აღშფოთებული და მიმართავდეს თავის ქმედებებს ძალადობის წინააღმდეგ, ისინი მუდმივად ეძებენ თავისთვის სასურველ ახსნებს ასეთი ძალადობრივი აქტებისა და მთელ ენერგიას ხარჯავენ ამაზე. გუშინ ჩვენ მოვისმინეთ მყისიერად სამარცხვინო ახსნა მზესუმზირის ჭამის და რაღაც რაფინირებულობაზე საუბრის ამ კანდიდატთან დაკავშირებით.

გუშინ ჩვენ მოვისმინეთ, როდესაც გაიჟღერა კალაძის სახელმა ამ მძიმე დანაშაულთან დაკავშირებით, კალაძის, რომელიც დაკავშირებულია მათ შორის კორცხელთან. ასევე არა ერთხელ გაიჟღერა მისმა სახელმა კრიმინალურ პროცესებთან კავშირში. ჩვენ არაერთხელ გვითქვამს, რომ ის ძალადობრივი გარემო, რომელიც მიმართულია ოპონენტების წინააღმდეგ, არის არა რომელიმე პოლიტიკური პარტიის პრობლემა, ან ზოგადად, არა მხოლოდ პოლიტიკური პრობლემა, არამედ მთლიანად საზოგადოების, ჩვენი ქვეყნის საერთო პრობლემა. ჩვენ ვხედავთ, რომ ამან გამოიწვია ადამიანების პირდაპირ ჩახოცვა ქუჩაში

ჩვენ ვიყავით ვაკეში მომსწრეები, როდესაც კეთილსინდისიერი მოქალაქე ვაკეში კალაშნიკოვით" ჩაცხრილეს რამდენიმე დღის წინ მოკლეს 15 წლის ბიჭი, გუშინწინ კიდევ ერთი ადამიანი დაჭრეს. ეს არის ის ძალადობრივი გარემო, რომელიც დადგა იმის შედეგად, რომ ხელისუფლება არ ებრძვის კრიმინალს, ხელისუფლება ახალისებს ძალადობას და არის უპასუხისმგებლო".

2 ოქტომბერს გორის მაჟორიტარი დეპუტატობის კანდიდატს, ირაკლი ოქრუაშვილს, გორში, რკინიგზის სადგურის დასახლებაში იმ დროს ესროლეს, როდესაც ამომრჩეველს ხვდებოდა. დაჭრილები არიან ოქრუაშვილის თანმხლები ორი პირი, მათ შორის ოქრუაშვილის დაცვის წევრი.