ბერძნული მითოლოგია სიზიფეს, ანუ სისიფოსის შესახებ გვიყვება, რომ ის საკუთარი ცოდვების გამო დაისაჯა და ვალდებულია, უზარმაზარი ლოდი მთის წვერზე აიტანოს. ლოდი ყოველ ჯერზე დაბლა გორდება და ამბის მთავარი გმირის ტანჯვაც უსასრულოდ გრძელდება... მთელი მისი ცხოვრება მწვერვალისკენ დამღლელი სვლაა.

ბერლინური Sisyphos სულ სხვანაირია, თუმცა მითიურ მოსახელესთან ერთი რამ მაინც აერთიანებს - დროის არარსებობა. სისიფოსში წვეულება დაუსრულებლად გრძელდება და რაც მთავარია, ამ პროცესში ყველა სტუმარი ახერხებს საკუთარი ლოდის ჩამოშორებას.

თუ ბერლინის ღამის ცხოვრებაზე ისტორიები მოგისმენიათ, ალბათ, ამ ისტორიებში ტექნო-გიგანტები, ბერგჰაინი და ტრეზორი ფიგურირებდნენ, თუმცა ბერლინელებს რომ გაესაუბროთ, ბევრ ისეთ დიდ და პატარა კლუბს დაგისახელებენ, რომლებიც მუსიკალური სპექტრის სხვადასხვა წერტილებში არიან განლაგებული.

სისიფოსი კლუბზე მეტად ფესტივალს ჰგავს: რამდენიმე სცენა, გაშლილი სივრცე ბალახზე წამოსაწოლად, სიმწვანე და ფერად ტანსაცმელში გამოწყობილი სტუმრები. "ჰიპების სოფელი" - ალბათ, ეს ყველაზე ზუსტი დახასიათება იქნებოდა. ლაინაფის წინასწარ მოძებნა საკმაოდ რთულია, რაც იმას ნიშნავს, რომ ზუსტად არასდროს იცი, როგორი მუსიკა დაგხვდება. მთავარია, კლუბი ღია იყოს.

ეს "საერთო საიდუმლო" სისიფოსის სტუმრებს ერთმანეთთან აახლოებს და თუ კლუბის ერთი რეივით შეყვარება არსებობს, შეუძლებელია, სისიფოსში ეგ არ დაგემართოთ.

ახლა რაც შეეხება eZo-ს

რატომ ვლაპარაკობ ამდენს აღმოსავლეთ ბერლინში მდებარე კლუბზე? იმიტომ, რომ ზემოთ ნახსენები ემოციები გეოგრაფიულად შეზღუდული სულაც არაა.

"პირველად სისიფოსში 2013 წელს, ბერლინში ზღაპრული მოგზაურობის მიწურულს მოვხვდი. მაშინ მივხვდი, რომ არ არსებობს ნივთი, რომელსაც უფრო კრეატიულ დატვირთვას ვერ მისცემ, ვიდრე მისი ნაგავში მოსროლაა", - ამბობს ეზოს ერთ-ერთი ორგანიზატორი, კომუნა "მზესუმზირის" წევრი ვახუნა ქავთარაძე. სისიფოსის ეზო სწორედ ასეთი ნივთებით და მიტოვებული მანქანებითაა სავსე, რომელთა გარეშეც კლუბის დამახასიათებელი ესთეტიკა ვერ იარსებებდა.

სისიფოსისა და ეზოს დამეგობრობაც სპონტანურად მოხდა, საქართველოს საზღვრებს მიღმა, როცა ერთ-ერთ ჩვეულებრივ საღამოს ბერლინში გასართობად ჩასულმა თბილისელმა სტუმრებმა სისიფოსის პერსონალს შესთავაზეს, თქვენი და ეზოს კოლაბორაცია საინტერესო იქნებოდაო. აღმოჩნდა, რომ მათ სხვადასხვა არტისტებისგან და პრომოუტერებისგან ჰქონდათ მოსმენილი, რომ საქართველოში არსებობს ადგილი, რომელიც ძალიან შთამბეჭდავ ფორმებს იღებს წლიდან წლამდე. მაშინვე დაინტერესდნენ.

საერთო შტრიხების დანახვა არ გასჭირვებიათ: საზეიმო განწყობა, დამოკიდებულება სტუმრების მიმართ, მათ სულიერ თუ ფიზიკურ კომფორტზე ფიქრი და მუსიკის მიღმა ისეთი პირობების შექმნა, რომელსაც სხვაგან ვერსად ნახავ. ასე გაჩნდა Sisyphos-ის შოუქეისის იდეა, რომელიც მალე რეალობად იქცევა.

13 ივლისს eZo-ს დახურვის საზეიმო ღონისძიებაზე სისიფოსი მთელი თავისი გუნდით იქნება წარმოდგენილი: მხატვრებით, დეკორატორებით, საფირმო პიცითა და მუსიკოსებით. ისინი თან სტუმრები იქნებიან ჩვენს ქალაქში და თან... მასპინძლები. ამ ივენთისთვის სპეციალურად შეიქმნა განათების ინსტალაციაც, რომელზეც სისიფოსის დიზაინერებმა კომუნა მზესუმზირას წევრებთან ერთად იმუშავეს.

გარდა ამისა, ეზოზე ასულს დაგხვდებათ ოთხი მუსიკოსი (David Silver, Juli N More, Kolja Gerstenberg და Norman Weber) და სისიფოსის საფირმო იხვები, რომლებიც ერთმანეთს კოცნიან.

ასე რომ, თუ თქვენ არ მიდიხართ ბერლინში, ბერლინი მოვა თქვენთან.

ბილეთების შესაძენად სასწრაფოდ გადადით ბმულზე.

ამავე თემაზე:

• eZo 2019 – ანუ, როგორ გავატაროთ ზაფხული
• eZo-ს მეორე ტალღა და ორი დერიკის ამბავი