არც ერთი სეზონი არ იგრძნობა დადგომისთანავე ისე, როგორც ზაფხული. პირველი ივნისი თენდება თუ არა, გაღვიძება ოდნავ უფრო ადვილდება, მუშაობა - ოდნავ უფრო რთულდება და გული გამუდმებით გარეთ მიგიწევს. გინდა თუ არ გინდა, ფეხები საცეკვაოდ მიგერეკებიან, თანაც ისე, რომ წინააღმდეგობის გაწევას აზრიც არ აქვს.

ეს შეგრძნება ხომ ნაცნობია, არა? ახლა კიდევ ერთ ნაცნობ შეგრძნებაზე მოგიყვებით: სადმე რომ მიდიხარ და მუსიკა შორიდან გესმის, თან ძალიან გეჩქარება, თან მთლად სირბილით მისვლაც არ გინდა, თან ცქმუტავ, თან წინ მიიწევ და წინასწარ ფიქრობ, ვის ნახავ, რას დალევ, სად მიწვები, როგორ ეგრილება და რა ემოციებით დაბრუნდები შინ.

აი, ზუსტად ამ შეგრძნებების ნაზავია ეზო - ელექტრონული მუსიკის ფესტივალი, რომელიც წელს უკვე მეხუთედ ტარდება. ამ ხნის განმავლობაში კომუნა Mzesumzira-მ ბევრი ემოცია, ბევრი ფერადი ფოტო და საუკეთესო ღონისძიებები გვაჩუქა.

წელს ეზო კიდევ უფრო გაფართოვდა: გაჩნდა ახალი სცენა Kosmos და მეტი დასასვენებელი ადგილი, დაემატა ტერასები და ბარები. წლევანდელ ეზოში ყველაფერი დაგხვდებათ, რაც ბავშვობაში ეზოში ჩასულს ასე გვაკლდა ხოლმე.

ფესტივალს წინა წლებისგან განსხვავებით მხოლოდ ორი თარიღი აქვს დაანონსებული - 14-15 ივნისი და 13 ივლისი, მაგრამ ორივე დახუნძლულია ელექტრონული მუსიკის ლეგენდებით.

წელს ეზოს ახალი სტუმარიც ჰყავს. ფესტივალს ბერლინის ერთ-ერთი ყველაზე გამორჩეული ღამის კლუბი, სისიფოსი ეწვევა: საფირმო პიცით, პლაჟით, დეკორაციებით, განათებით და, რაღა თქმა უნდა, რეზიდენტი დიჯეებით. ამ დროს ეზოს პატარა სცენა სრულად გარდაიქმნება და სისიფოსის კონცეფციას მოერგება.


ეზოს მთავარ და ახალ (Kosmos) სთეიჯებს სინათლის ჯადოქარი ქრისტიან ვოლცი გააცოცხლებს, რომელიც შუქ-ჩრდილებით ნახატებივით კადრებს ქმნის. პატარა სთეიჯს კი საბა მეზვრიშვილი გაანათებს, რომელიც მზესუმზირას შოუქეისებზე მუშაობს და კომუნა მზესუმზირას წევრია.

თუ ეს ინფორმაციაც არაა საკმარისი, გეტყვით, რომ მთელი თბილისი მაინც იქ იქნება და გაჯიუტებას და ცხელ ქალაქში დარჩენას არავითარი აზრი არ აქვს.

ასე რომ, ამოდით მთაწმინდაზე და მერე ერთად ჩავიდეთ ეზოში.

ბილეთები შეგიძლიათ შეიძინოთ აქ.