ევროპასთან ინტეგრაციის კომიტეტის თავმჯდომარის, თამარ ხულორდავას აზრით, რუსეთის პრეზიდენტის მიერ საქართველოს ოსების გენოციდსა და აფხაზეთის ოკუპაციაში დადანაშაულება სიახლე არაა. მომხდარი მსგავსად შეაფასა პრემიერმა და საგარეო საქმეთა მინისტრმაც.

"პუტინის პოზიცია ვინმესთვის სიახლეა?! არ ავყვეთ რუსეთს ამ სახიფათო თამაშში. საქართველოს საზღვრები აღიარებულია საერთაშორისო თანამეგობრობის მიერ. საერთაშორისოდ აღიარებული საზღვრების ეჭვქვეშ დაყენება მხოლოდ საქართველოს პრობლემა არ არის. ეს საფრთხეს უქმნის საერთაშორისო წესრიგს მთელ კონტინენტზე. ჩვენ ვიცით რა არის სიმართლე. ეს ჩვენმა პარტნიორებმაც იციან", — აღნიშნა თამარ ხულორდავამ.

პუტინმა ჟურნალისტებთან საუბრისას ისტორიული ფაქტები დაამახინჯა და დაიწყო მტკიცება, რომ ოკუპანტი არა თავად, არამედ საქართველოა. ის ირწმუნებოდა, რომ 1918 წელს საქართველომ გერმანიის დახმარებით აფხაზეთის ოკუპაცია მოახდინა. გარდა ამისა, საქართველო ოსების გენოციდში დაადანაშაულა. ამ თემაზე შეფასებები გააკეთეს პრემიერ-მინისტრმა მამუკა ბახტაძემ და საგარეო საქმეთა მინისტრი დავით ზალკალიანმა.