საგარეო საქმეთა მინისტრი დავით ზალკალიანი აცხადებს, რომ რუსეთის პრეზიდენტის მიერ საქართველოს ოსების გენოციდში და აფხაზეთის ოკუპაციაში დადანაშაულება ისტორიის არასწორად, სუბიექტურად და ტენდენციურად წარმოჩენის მაგალითია. პრემიერ-მინისტრ მამუკა ბახტაძის მსგავსად ის ამბობს, რომ ეს ისტორიის დამახინჯების პირველი შემთხვევა არ არის რუსეთის მხრიდან.

ზალკალიანი აცხადებს, რომ საერთაშორისო თანამეგობრობა კარგად არის ინფორმირებული საქართველოს ისტორიაზე, რასაც მოწმობს ის ფაქტი, რომ ისინი აღარებენ ქვეყნის ტერიტორიულ მთლიანობას.

მცოცავი ბორდერიზაციისა და ანტისაოკუპაციო აქციების პარალელურად, ოკუპანტი ქვეყნის პრეზიდენტი ვლადიმერ პუტინი ამტკიცებს, რომ ოკუპანტი არა თავად, არამედ საქართველოა. ის ოკუპაციის საკუთარ ვერსიას ავრცელებს და ირწმუნება, რომ 1918 წელს საქართველომ გერმანიის დახმარებით აფხაზეთის ოკუპაცია მოახდინა. ის კიდევ უფრო შორსაც წავიდა და ოსების გენოციდში საქართველო დაადანაშაულა. ეს განცხადებები ვლადიმერ პუტინმა ჟურნალისტებთან იქამდე გააჟღერა, სანამ რუსთავი 2-ის ეთერში მისი გინების ფაქტს გამოეხმაურებოდა.

ამის გარდა, ზალკალიანმა შეაფასა პუტინის სხვა განცხადებაც. კერძოდ, საგარეო საქმეთა მინისტრმა განაცხადა, რომ მიესალმება რუსეთის პრეზიდენტის გადაწყვეტილებას სანქციების არდანიშვნის შესახებ. მანამდე კი საგარეო საქმეთა სამინისტრომ დაგმო გიორგი გაბუნიას მიერ პირდაპირ ეთერში პუტინის გინება და საერთაშორისო თანამეგობრობას "რეაგირებისკენ" მოუწოდა.