ტელეკომპანია რუსთავი 2-მა მაუწყებლობა დღეს დილით, 07:30 საათიდან განაახლა. მაუწყებლობა გუშინ, გვიან ღამით შეწყდა და ეთერი დაახლოებით ოთხი საათის განმავლობაში იყო გათიშული.

მაუწყებლობის შეწყვეტის შესახებ ტელეკომპანიის გენერალურმა დირექტორმა, ნიკა გვარამიამ განაცხადა. გვარამიას თქმით, ტელეკომპანია არ განაახლებდა მაუწყებლობას, ვიდრე "არხის უსაფრთხოება არ იქნებოდა დაცული". მისივე თქმით, რუსთავი 2-თან აქცია არის ხელისუფლების მართული და პირდაპირი მცდელობა არხში შეჭრისა და ხელში ჩაგდების.

რუსთავი 2-თან აგრესიული ჯგუფები რამდენიმე საათის განმავლობაში აქციას მართავდნენ. ისინი კვერცხებითა და ცოცხებით იყვნენ და ჯერ გაბუნიასა და გვარამიას გადადგომას, შემდეგ კი დასჯას მოითხოვდნენ. აქციის მონაწილეები აგრესიულად მოუწოდებენ არხის თანამშრომლებს დაეტოვებინათ ტელევიზია. რუსთავი 2-ის ერთმა ოპერატორმა აქციის მსვლელობისას მუშაობა შეწყვიტა, კამერა ეზოში დატოვა და ტელევიზიიდან წავიდა.

ასევე, აქციის მონაწილეები აქებდნენ შს მინისტრ გიორგი გახარიასაც და ამბობდნენ, რომ ის არ უნდა გადადგეს.

პუტინის გინება, რ2-ის პოზიცია და გამოხმაურებები

რუსთავი 2-ის პირდაპირ ეთერში წამყვანმა გიორგი გაბუნიამ რუსეთის ფედერაციის პრეზიდენტს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. გაბუნიას ქცევა არხმა კატეგორიულად დაუშვებლად მიიჩნია და გაემინჯა. მთავრობის წარმომადგენლებმა კი ეს ქვეყნის წინააღმდეგ ომად შეაფასეს.

კახა კალაძემ თქვა, რომ ამას მკაცრი რეაგირება უნდა მოჰყვეს და ქვეყნისთვის საფრთხის შექმნას არ დაუშვებენ. მსგავსი შინაარსის განცხადებები ჰქონდათ პრემიერ-მინისტრსა და პარლამენტის თავმჯდომარესაც. ორივე მათგანმა აღნიშნა, რომ გაბუნიას გინება საფრთხეს ქმნის და ქვეყნის მტრობაა. პრეზიდენტიც იმავე აზრზეა და ფიქრობს, რომ ეს ქცევა ან "ახალი ომის პროვოცირებას ემსახურება", ან "რევანშია დაუსრულებელ გადატრიალებაზე".

რუსთავი 2 ამბობს, რომ გაბუნიას მიმართვას არხის თვითრეგულირების ორგანო განიხილავს, მთავრობის წარმომადგენლების მსგავსი შეფასებები კი სარედაქციო პოლიტიკაში ჩარევად მიაჩნიათ.

გაბუნიას მიმართვა უკვე შეაფასა ეთიკის ქარტიამაც. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს შეზღუდოს გამოხატვის თავისუფლება.

ამის ფონზე კი რუსთავი 2-თან აქცია მიმდინარეობს, სადაც მოითხოვენ, რომ გაბუნიამ დატოვოს არხიც და ქვეყანაც. ანტიოპოზიციური და პროსახელისუფლებო ფეიჯები, ასევე, ძალადობრივი ჯგუფები და ქართული ოცნების მხარდამჭერები მოსახლეობას მოუწოდებენ, რომ "არ შეარჩიონ გაბუნიას" მომხდარი.