რუსთავი 2-თან შეკრებილი საპროტესტო აქციის მონაწილეები, რომლებიც ნიკა გვარამიასა და გიორგი გაბუნიას დასჯას ითხოვენ, შინაგან საქმეთა მინისტრს აქებენ და მოითხოვენ, არ გადადგეს გიორგი გახარია.

"ვაქებთ, კარგი ადამიანი და მინისტრია ჩვენი გიორგი გახარია. ის გველისწიწილები რო არიან ხო, გვარამია, ბოკერია და ვინცაა, მაი ნაცები ეგენი უნდა დაეჭირა", — განუცხადა On.ge-ს აქციის ერთ-ერთმა მონაწილემ.

ერთი პირი ამბობს, რომ "რუსთავი 2 უნდა გაწყდეს, თავის ნაცებიანად". ერთი კი ამტკიცებს, რომ შს მინისტრი არ უნდა გადადგეს, რადგან საქართველოს სჭირდება.

აქციის ერთი მონაწილე ამტკიცებს, რომ შს მინისტრი 20-21 ივნისს აქციების დროს სწორად მოიქცა.

"გვახარიას კი არ ვაქებთ, გახარია მოიქცა აბსოლუტურად ადეკვატურად, ისე, როგორ უნდა მოქცეულიყო. შევარდნა არ დაუშვა პარლამენტში", — აცხადებს ის. (სტილი დაცულია).

შეგახსენებთ, რომ გახარიას გადადგომის მოთხოვნით აქციები უკვე მე-18 დღეა იმართება. რუსთავი 2-თან საპროტესტო აქცია კი გიორგი გაბუნიას განცხადებების შემდეგ დაიგეგმა.

საპროტესტო აქციის წევრები გაბუნიასა და გვარამიას დაპატიმრებას მოითხოვენ. ისინი აგრესიულები არიან და კვერცხებსა და ცოცხებს ისვრიან. ასევე, აგრესიულად მოუწოდებენ არხის თანამშრომლებს დატოვონ ტელევიზია. რუსთავი 2-ის ერთმა ოპერატორმა აქციის მსვლელობისას მუშაობა შეწყვიტა, კამერა ეზოში დატოვა და ტელევიზიიდან წავიდა.

არხმა მაუწყებლობა შეწყვიტა. დირექტორმა, ნიკა გვარამიამ მოუწოდა მთავრობას, დაიცვას არხის თანამშრომლების უსაფრთხოება. მისი თქმით, ეთერში არ ავლენ იქამდე, სანამბ უსაფრთხოების გარანტიას არ მიიღებენ. შსს-მ განაცხადა, რომ იცავენ წესრიგს აქციაზე და არხის თანამშრომლების უსაფრთხოებას.

პუტინის გინება, რ2-ის პოზიცია და გამოხმაურებები

რუსთავი 2-ის პირდაპირ ეთერში წამყვანმა გიორგი გაბუნიამ რუსეთის ფედრაციის პრეზიდენტს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. გაბუნიას ქცევა არხმა კატეგორიულად დაუშვებლად მიიჩნია და გაემინჯა. მთავრობის წარმომადგენლებმა კი ეს ქვეყნის წინააღმდეგ ომად შეაფასეს.

კახა კალაძემ თქვა, რომ ამას მკაცრი რეაგირება უნდა მოყვეს და ქვეყნისთვის საფრთხის შექმნას არ დაუშვებენ. მსგავსი შინაარსი განცხადებები ჰქონდათ პრემიერ-მინისტრსა და პარლამენტის თავმჯდომარესაც. ორივე მათგანმა აღნიშნა, რომ გაბუნიას გინება საფრთხეს ქმნის და ქვეყნის მტრობაა. პრეზიდენტიც იმავე აზრზეა და ფიქრობს, რომ ეს ქცევა ან "ახალი ომის პროვოცირებას ემსახურება", ან "რევანშია დაუსრულებელ გადატრიალებაზე".

რუსთავი 2 ამბობს, რომ გაბუნიას მიმართვას არხის თვითრეგულირების ორგანო განიხილავს, მთავრობის წარმომადგენლების მსავსი შეფასებები კი სარედაქციო პოლიტიკაში ჩარევად მიაჩნიათ.

გაბუნიას მიმართვა უკვე შეაფასა ეთიკის ქარტიამაც. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს შეზღუდოს გამოხატვის თავისუფლება.

ამის ფონზე კი რუსთავი 2-თან აქცია მიმდინარეობს, სადაც მოითხოვენ, რომ გაბუნიამ დატოვოს არხიც და ქვეყანაც. ანტიოპოზიციური და პროსახელისუფლებო ფეიჯები, ასევე, ძალადობრივი ჯგუფები და ქართული ოცნების მხარდამჭერები მოსახლეობას მოუწოდებენ, რომ "არ შეარჩიონ გაბუნიას" მომხდარი.